ຕ້ອງການຖົງຢາງເກົ່າ! ເພື່ອມອບໃຫ້ສູນຄົນພິການ ແລະ ຊົນເຜົ່າ ນຳໄປຜະລິດເປັນສິນຄ້າ


ພຸດອາລີ ວົງສະໃໝ ເຮັດທຸລະກິດເພື່ອຊາວບ້ານ ແລະ ຄົນພິການລາວ ເມື່ອບໍ່ດົນມານີ້ໄດ້ປະກາດຮັບບໍລິຈາກຖົງຢາງເກົ່າ ຫຼື ຖົງຢາງທີ່ໃຊ້ແລ້ວ ຮັບແບບບໍ່ຈຳກັດຈຳນວນ ບໍ່ຈຳກັດສີ (ຖົງຢາງທີ່ເຮົາຫິ້ວແບບປົກກະຕິ) ເພື່ອເປັນການຮັກສາໂລກໄປພ້ອມໆກັນ ຖົງຢາງດັ່ງກ່າວຈະນຳມາແປຮູບເປັນສິນຄ້າຫັດຖະກຳຣີໄຊເຄິລ ແລະ ພິເສດໄປກວ່ານັ້ນແມ່ນຄົນພິການເປັນຜູ້ຜະລິດ ເປັນການສົ່ງເສີມຄົນພິການອີກດ້ວຍ.

ພ້ອມກັນນີ້ ເປັນການຊຸກຍູ້ໃຫ້ຄົນຮູ້ຮັກສາໂລກໄປດ້ວຍກັນ ພຽງແຕ່ນຳເອົາຖົງຢາງທີ່ບໍ່ໄດ້ໃຊ້ແລ້ວມາໃຫ້ທາງສູນ ພຽງເທົ່ານີ້ເຮົາກໍສາມາດຊ່ວຍໂລກໄດ້ແລ້ວບໍ່ໜ້ອຍກໍຫຼາຍ ຊ່ວຍໆກັນໄປເທື່ອລະເລັກລະໜ້ອຍແລ້ວມັນກໍຄ່ອຍໆຫຼາຍ.

ນອກຈາກນີ້ ສູນຄົນພິການລາວ ຍັງສົ່ງເສີມພັດທະນາຄົນພິການໃນຫຼາຍຮູບແບບ ບໍ່ວ່າຈະເປັນການພັດທະນາສີມືໃນການເຮັດຫັດຖະກຳ ແລະ ຜ່ານມາກໍໄດ້ມີການເຮັດກິດຈະກຳປະກອບກັບຫຼາຍໆພາກສ່ວນ ໂດຍສະເພາະກ່ຽວກັບການຮັກສາສິ່ງແວດລ້ອມ.

ພາຍໃນອະນາຄົດ ສິນຄ້າທີ່ນຳມາແປຮູບອາດຈະໄດ້ຂະຫຍາຍຕະຫຼາດໄປຍັງຕ່າງປະເທດ ອາດຈະເປັນປີໜ້າ ເຊິ່ງກຳລັງສຶກສາຫາແນວທາງການຂະຫຍາຍຕະຫຼາດອອກສູ່ໂລກກວ້າງ ເພື່ອເປັນການຮັກສາໂລກ ແລະ ເປັນຂວັນກຳລັງໃຈໃຫ້ແກ່ຜູ້ຜະລິດ ເຮັດໃຫ້ຜູ້ປະກອບອາຊີບມີລາຍໄດ້ຂຶ້ນຕື່ມ. ປັດຈຸບັນແມ່ນຍັງຂາຍພາຍໃນປະເທດ ຈະມີຫັດຖະກຳທີ່ຫຼາກຫຼາຍບໍ່ວ່າຈະເປັນເກີບແຮນເມດ, ເຄື່ອງແສ່ວຊົນເຜົ່າຕ່າງໆ, ເສື້ອຜ້າແຟຊັນຊົນເຜົ່າ, ເຄື່ອງປະດັບເຮັດດ້ວຍມື, ຜະລິດຕະພັນໄມ້ໄຜ່, ເຈ້ຍຂີ້ອ້ອຍ-ຂີ້ຊ້າງ ແລະ ປູກດອກອັນຊັນອອກຂາຍ.

ການຜະລິດສິນຄ້າຫັດຖະກຳຂອງຄົນພິການ ລວມແລ້ວກໍຖືວ່າຍາກພໍສົມຄວນ ກວ່າຈະໄດ້ຜະລິດຕະພັນໜຶ່ງ ຕ້ອງຜ່ານຂັ້ນຕອນໃນຫຼາຍຂັ້ນ, ໃນການເຮັດເຈ້ຍບັນຈຸພັນຮັກໂລກໄດ້ ກໍບໍ່ທຳມະດາ ຕ້ອງຜ່ານການວິທີຂັ້ນຕອນ ແລະ ຄວາມຊຳນິຊຳນານຂອງສີມືກຸ່ມຄົນພິການ. ແຕ່ລະໂຄງການ ແມ່ນໄດ້ເຫັນຊັດເຈນເລີຍວ່າ ກຸ່ມຄົນພິການກໍສາມາດຜະລິດຫັດຖະກຳດ້ວຍຕົນເອງໄດ້ ພ້ອມຍັງເປັນຜົນງາມທີ່ລະອຽດອ່ອນ ແລະ ງາມຕາ.

ລາຍລະອຽດການຮັບຖົງຢາງ:

–  ຖົງຢາງເກົ່າທີ່ຮັບແມ່ນ: ຖົງຢາງຕາມຕະຫຼາດ ບໍ່ຈຳກັດສີ ບໍ່ຈຳກັດຂະໜາດ.

– ເອົາໄປມອບຢູ່ ສູນຄົນພິການ ແລະ ຊົນເຜົ່າ.

– ຕ່າງແຂວງສາມາດສົ່ງ: ອານຸສິດ ສາຂາຂົວຫຼວງ.

ຂອບໃຈຂໍ້ມູນຈາກ: Jaah Andersen

https://bit.ly/3k5hspK

ຕິດຕາມຂ່າວທັງໝົດຈາກ LaoX: https://laox.la/all-posts/