ອອສເຕເລຍກຽມໃຊ້ດາວທຽມກວດຫາໄຟປ່າໄດ້ໄວພາຍໃນ 1 ນາທີ ເພື່ອປົກປ້ອງປ່າຈາກອັກຄີໄພ


ເມື່ອຕົ້ນປີ 2020 ທີ່ຜ່ານມາໂລກໄດ້ສູນເສຍປ່າຄັ້ງໃຫຍ່ ກັບເຫດການໄຟໄໝ້ປ່າໃນປະເທດອອສເຕເລຍ ອັກຄີໄພທີ່ບໍ່ມີໃຜຢາກໃຫ້ເກີດ ເພາະມັນສ້າງຄວາມສູນເສຍຢ່າງມະຫາສານ ແລະ ໃຊ້ເວລາດົນຈຶ່ງຈະສາມາດປູກປ່າທົດແທນໄດ້.

ໂດຍສະເພາະເມື່ອລະດູຮ້ອນ ປ່າໃນທົ່ວໂລກລ້ວນກໍມີຄວາມສ່ຽງໃນການເກີດໄຟປ່າ ເພື່ອປ້ອງກັນຄວາມສູນເສຍຈາກໄຟປ່າ ອອສເຕເລຍໄດ້ພັດທະນາດາວທຽມທີ່ກວດຈັບໄຟປ່າ ທີ່ໃຊ້ເວລາພຽງ 1 ນາທີ ກໍຮູ້ຕຳແໜ່ງໄຟປ່າ.

Fireball ບໍລິສັດໃນລັດ Queensland ໄດ້ເຜີຍການພັດທະນາດາວທຽມທີ່ກວດຫາໄຟປ່າໃນອອສເຕເລຍ ໂດຍຈະປ່ອຍດາວທຽມຂຶ້ນສູ່ວົງໂຄຈອນຂອງໂລກພາຍໃນປີ 2022, ໂດຍທັງລະບົບກວດຫາໄຟປ່າ ລວມທັງກ້ອງກວດຈັບພາກພື້ນດິນ ແລະ ໂດຣນ ເພື່ອວ່າຈະສາມາດສອດສ່ອງການເກີດໄຟປ່າໄດ້ທັນ.

ດ້ວຍສະພາບພູມອາກາດປ່ຽນແປງ ເຮັດໃຫ້ເກີດພື້ນທີ່ແຫ້ງແລ້ງຫຼາຍຂຶ້ນ, ລະດູຮ້ອນກໍຮ້ອນຫຼາຍຂຶ້ນ ແລະ ດົນນານກວ່າເກົ່າ ສົ່ງຜົນແກ່ສິ່ງມີຊີວິດ ແລະ ລະບົບນິເວດ ຈຶ່ງເຮັດໃຫ້ມີການຄິດຄົ້ນເທັກໂນໂລຢີຂຶ້ນມາເພື່ອຮັບມືກັບສະຖານະການດັ່ງກ່າວ.

ນັກວິຊາການຊີ້ວ່າ ພາຍໃນ 5 ປີ ອອສເຕເລຍຈະມີລະບົບປ້ອງກັນໄຟປ່າແບບອັດຕະໂນມັດດ້ວຍເທັກໂນໂລຢີຕ່າງໆ ບໍ່ວ່າຈະເປັນດາວທຽມ, ໂດຣນ ແລະ AI ທີ່ຈະຂັບເຄື່ອນການປ່ຽນແປງໃນວຽກງານການປ້ອງກັນໄຟປ່າ.

ຂອບໃຈຂໍ້ມູນຈາກ:

https://www.abc.net.au/news/science/2021-03-14/bushfires-detecting-them-from-space-fireball-satellite-launch/13203470?fbclid=IwAR1YyT1kRw_tW6XwDJ-pL69baIj2wPzlTjEnmz-QCnZCRPawwNLuDMLjbPA

ສິ່ງແວດລ້ອມ

#Australia#HOD#LaoX

error: Content is protected !!