ນັດດາວ ສາວນ້ອຍສຽງໃສ ທີ່ເຮັດໃຫ້ໜຸ່ມຫຼາຍໆຄົນເກີດອາການ “ແພງນ້ອງ”


“ຖາມຈັກຄຳ” ເພງເສົ້າສະໄຕລ໌ໄວໜຸ່ມທີ່ຫຼາຍໆຄົນອາດຈະເຄີຍໄດ້ຍິນກັນ ເປັນເພງຂອງສາວນ້ອຍໜ້າຮັກ ຜູ້ທີ່ເຕັມໄປດ້ວຍຄວາມສົດໃສ ແລະ ສຽງຮ້ອງອັນແສນຫວານ ຊື່ວ່າ Nutdao, ທີ່ຕໍ່ມາທັງສຽງຮ້ອງ ແລະ ເພງທີ່ນັດດາວຮ້ອງຕ່າງກໍຕິດຫູຫຼາຍໆຄົນ ໂດຍສະເພາະເພງ “ແພງອ້າຍ” ທີ່ຮ້ອງກັບທີມງານລູກເຂີຍໃສ່ມອງ ພ້ອມກັບຜົນງານເພງ “ຄົງຕ້ອງຍອມ (cover GX2)” ທີ່ເຮັດໃຫ້ ນັດດາວ ເປັນທີ່ຮູ້ຈັກຫຼາຍຂຶ້ນ.

ລອງມາເຮັດຄວາມຮູ້ຈັກກັບນັດດາວ ໃຫ້ຫຼາຍຂຶ້ນຜ່ານບົດສຳພາດຂອງທີມງານ LaoX ເຮົາ, ເຊິ່ງຜູ້ສຳພາດກໍອອກຕົວວ່າເປັນ ໜຶ່ງໃນແຟນຄລັບຂອງນັດດາວເຊັ່ນດຽວກັນ:

LaoX: ຢາກໃຫ້ແນະນຳຕົນເອງ ແດ່ເນາະ..​ ຊື່ ອາຍຸ ແລະ ປັດຈຸບັນເຮັດຫຍັງຢູ່ແດ່?
Nutdao: ໂດຍ, ນ້ອງຊື່ນັດດາວ ອາຍຸ 19 ປີ, ປັດຈຸບັນ ກໍຮ້ອງເພງ ເຮັດ YouTube ແລະ ກໍກຳລັງກຽມເສັງຮຽນຕໍ່ມະຫາວິທະຍາໄລແຫ່ງຊາດ ປະລິນຍາຕີ ສາຍພາສາອັງກິດ.

LaoX:  ຫຼາຍໆຄົນກໍຮູ້ຈັກນັດດາວໃນຖານະນັກຮ້ອງຢູ່ແລ້ວ, ຢາກຮູ້ວ່ານັດດາວເອງເລີ່ມຮ້ອງເພງມາແຕ່ຕອນໃດ?
Nutdao: ຮູ້ສຶກວ່າແຕ່ນ້ອຍເລີຍ ແຕ່ຮູ້ຄວາມຄົນເລີຍ ເປັນຄົນມັກຮ້ອງມັກເຕັ້ນ, ມັກການເອນເຕີເທນ ຢູ່ແລ້ວ.

LaoX: ແລ້ວສຳລັບການເລີ່ມເຮັດເພງລົງ YouTube ເດ ເລີ່ມຂຶ້ນຕອນໃດ?
Nutdao: ເລີ່ມເຮັດເພງແມ່ນຫາກໍປີປາຍ, ແຕ່ກ່ອນເປັນນັກຮ້ອງໂຟກຊອງ ຢູ່ແຖວບ້ານກັບໝູ່ຄູ່ພາກັນໄປ ເພງທຳອິດເລີຍກໍຄືເພງ ຖາມຈັກຄຳ ທີ່ແຕ່ງເອງ ເປັນເພງທີ່ມາຈາກອາການເອິກຫັກຕາມພາສາໄວໜຸ່ມໃນຕອນນັ້ນ.

LaoX: ຕອນທີ່ເພງເລີ່ມໄດ້ຮັບຄວາມນິຍົມ ຮູ້ສຶກແນວໃດແດ່? ແລ້ວສົ່ງຜົນແນວໃດຕໍ່ຕົວຂອງນັດດາວແດ່?
Nutdao: ຮູ້ສຶກດີໃຈຫຼາຍທີ່ມີຄົນມັກ ທຳອິດກໍຄິດວ່າຈະບໍ່ມີຄົນຟັງເລີຍ ແຕ່ກໍເກີນຄວາມຄາດໝາຍ, ເມື່ອເພງເປັນທີ່ຮູ້ຈັກກໍເລີ່ມມີໂອກາດໃໝ່ໆເຂົ້າມາຫຼາຍຂຶ້ນ ສ່ວນການໃຊ້ຊີວິດກໍເກືອບຈະບໍ່ປ່ຽນໄປ. ແຕ່ຈຸດປ່ຽນແທ້ໆ ແລະ ເຮັດໃຫ້ຄົນຮູ້ຈັກຫຼາຍຂຶ້ນກໍນ່າຈະມາຈາກເພງ ແພງອ້າຍ.

LaoX: ທາງຜູ້ສຳພາດເອງກໍເປັນຄົນໜຶ່ງທີ່ມັກຜົນງານຂອງ ນັດດາວ ຫຼາຍໆ ໂດຍສະເພາະເພງໃໝ່ທີ່ຊື່ວ່າ “ໃຫ້ເຈົ້າໄປ” ຢາກໃຫ້ນັດດາວລອງເວົ້າເຖິງເພງນີ້ແດ່ຈະໄດ້ບໍ?
Nutdao: ເພງໃຫ້ເຈົ້າໄປກໍຄືຕັ້ງໃຈຫຼາຍ ເພງນີ້ກໍຖືກແຕ່ງຕອນຊິນອນ ຮູ້ສຶກວ່າໄດ້ຟິລລິ່ງດີ, ສ່ວນຕົວ MV ເອງ ນ້ອງຢາກເຫັນຕົນເອງເວີຊັ່ນນັ້ນຈຶ່ງເຮັດອອກມາໃນມຸມມັ້ນ ເຊິ່ງນ້ອງກໍຮູ້ສຶກມັກຕົນເອງໃນຕອນນັ້ນ ຮ່າໆ.

LaoX: ນອກຈາກການຮ້ອງເພງແລ້ວ ຍັງ ມີສິ່ງທີ່ມັກອີກບໍ?
Nutdao: ສິ່ງທີ່ມັກກໍມີຫຼາຍເລີຍ, ທີ່ມັກກວ່າຮ້ອງເພງອີກຄືມັກເຕັ້ນ ແຕ່ຫຼາຍຄົນບໍ່ຄ່ອຍຮູ້, ມັກຟ້ອນ ແລະ ມັກການສະແດງ.

LaoX: ສຸດທ້າຍຢາກຝາກຫຍັງ ເຖິງຄົນທີ່ກຳລັງຈະເຂົ້າມາອ່ານບົດສຳພາດນີ້ແດ່ບໍ?
Nutdao: ຝາກຕິດຕາມຜົນງານນັດດາວໄປເລື້ອຍໆແລ້ວກັນ.

ຊ່ອງທາງ YouTube : NUTDAO NDI

IG: Nutdao24

Tiktok: nutdaothonebundit

LaoX: ຂອບໃຈຫຼາຍໆ ສຳລັບການສຳພາດມື້ນີ້

Nutdao: ໂດຍຂອບໃຈຫຼາຍໆເຊັ່ນກັນເດີ.

ສຳພາດໂດຍ: ເຊັນໄປ

ວັນທີ 29 ກັນຍາ 2021.

ຮູບພາບຈາກ: Facebook Nutdao Thonebundit

ຕິດຕາມຂ່າວທັງໝົດຈາກ LaoX: https://laox.la/all-posts/

ບັນເທີງ

#HOD#LaoX#ຖາມຈັກຄຳ#ນັດດາວ#ແພງນ້ອງ

error: Content is protected !!