ໄຄຣັນ ຄວາຊີ (Kairan Quazi’s) ເດັກໜຸ່ມຫົວໄວຜູ້ສໍາເລັດການສຶກສາລະດັບປະລິນຍາຕີ ສາຂາວິສະວະກຳຄອມພິວເຕີ ແລະ ວິສະວະກຳສາດ ໄດ້ໃນອາຍຸພຽງ 14 ປີ ກາຍເປັນເດັກໜຸ່ມທີ່ອາຍຸນ້ອຍທີ່ສຸດທີ່ຈົບປະລິນຍາຕີໃນ ມະຫາວິທະຍາໄລ ຊານຕາ ຄາຣາ (Santa Clara University) ໃນອາເມຣິກາ. ພ້ອມກຽມເຂົ້າເຮັດວຽກເປັນ Software Engineer ໃຫ້ກັບ SpaceX ເຊິ່ງເປັນບໍລິສັດເຮັດເລື່ອງການຂົນສົ່ງອະວະກາດ ອັນດັບຕົ້ນຂອງໂລກ.
ຄວາຊີ ໂພສຂໍ້ຄວາມໃນ Linked-In ວ່າ: ສະຖານີຕໍ່ໄປ: “SpaceX! ຂ້ອຍກໍາລັງຈະໄດ້ເຮັດວຽກໃນບໍລິສັດທີ່ຄັກທີ່ສຸດໃນໂລກ ໃນຖານະ Software Engineer ໃນທີມວິສະວະກອນຂອງ Starlink”
ໂດຍເດັກໜຸ່ມ ອາຍຸ 14 ປີ ຄົນນີ້ ເກີດ ແລະ ເຕີບໃຫຍ່ໃນເມືອງ ອາຣາເມດາ ຣັດແຄລິຟໍເນຍ ປະເທດ ສະຫະລັດອາເມຣິກາ. ໂດຍພໍ່ແມ່ຂອງລາວເລົ່າວ່າ ຄວາຊີ ສາມາດເວົ້າໄດ້ແບບເຕັມປະໂຫຍກຕັ້ງແຕ່ອາຍຸ 2 ປີ ແລະ ເມື່ອເຂົ້າສູ່ລະບົບການສຶກສາ ລາວຈຶ່ງໄດ້ຮູ້ວ່າ ຕົນເອງນັ້ນມີທັກສະໃນການຮຽນຮູ້ທີ່ໂດດເດັ່ນກວ່າເດັກຮຸ່ນດຽວກັນ.
ຄວາຊີ ເຄີຍໃຫ້ສຳພາດວ່າ: “ໃນຕອນຂ້ອຍຢູ່ ປ.3 ມັນຊັດເຈນກັບນາຍຄູ, ພໍ່ແມ່ ແລະ ໝໍປະຈຳຕົວນ້ອງ ແລ້ວວ່າການສຶກສາໃນລະດັບທົ່ວໄປບໍ່ແມ່ນທາງທີ່ເໝາະສຳລັບຄວາມສາມາດສຳລັບການຮຽນຮູ້ຂອງນ້ອງ”
ຄວາຊີ ເລີ່ມລົງທະບຽນສະໝັກເຂົ້າຮຽນ ມະຫາວິທະຍາໄລໃນຊຸມຊົນຕັ້ງແຕ່ ອາຍຸ 9 ປີ ແລະ ເມື່ອອາຍຸໄດ້ 10 ປີ ລາວໄດ້ໄປເຝິກງານທີ່ Intel Labs ບໍລິສັດດ້ານວິທະຍາສາດຄອມພິວເຕີ ໃນຖານະນັກວິໄຈດ້ານ AI. ຈາກນັ້ນລາວໄດ້ຍ້າຍເຂົ້າມາຮຽນໃນ ມະຫາວິທະຍາໄລ ຊານຕາ ຄາຣາ ແລະ ກຳລັງຈະຮັບໃບປະລິນຍາໃນວັນທີ 17 ມິຖຸນາ ຫຼື ວັນເສົາທີ່ຈະຮອດນີ້.
ໄຄຣັນ ຄວາຊີ ກ່າວເຖິງຕອນທີ່ລາວເຂົ້າໄປຮຽນທີ່ມະຫາວິທະຍາໄລ ຊານຕາ ຄາຣາ ໃໝ່ໆວ່າ: “ຕອນຂ້ອຍເຂົ້າໄປຮຽນໃໝ່ໆ ທຸກຄົນຕົກໃຈ ແລະ ຕື່ນເຕັ້ນຫຼາຍ ແຕ່ເມື່ອເວລາຜ່ານໄປ 2-3 ມື້ ຂ້ອຍຮູ້ສຶກວ່າ ຄວາມແປກປະຫຼາດນັ້ນເລີ່ມຫາຍໄປ ແລະ ຂ້ອຍຄິດວ່າພວກເຂົາເຈົ້າເຫຼົ່ານັ້ນເລີ່ມເບິ່ງຂ້ອຍເປັນຄົນທຳມະດາ”.
ນັບໄດ້ວ່າເປັນອີກໜຶ່ງເດັກໜຸ່ມມະຫັດສະຈັນ ເພາະຢ່າລືມວ່າທຸກເລື່ອງນີ້ທັງ ການຮຽນຈົບປະລິນຍາຕີ ຫຼື ແມ່ນແຕ່ການຈະເຂົ້າເຮັດວຽກໃນບໍລິສັດທີ່ພັດທະນາເລື່ອງອະວະກາດ ອັນດັບຕົ້ນໆຂອງໂລກ ທັງໝົດນີ້ ແມ່ນລາວເຮັດໄດ້ຕັ້ງແຕ່ອາຍຸ 14 ປີ ທີ່ຍັງບໍ່ສາມາດ ມີໃບຂັບຂີ່ເປັນຂອງຕົນເອງໄດ້ເລີຍ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
