ການທ່ອງທ່ຽວໃນລາວ ມີການຟື້ນຕົວຄືນ ໂດຍມີນັກທ່ອງທ່ຽວຕ່າງປະເທດເຂົ້າມາທ່ຽວພາຍໃນ 7 ເດືອນຕົ້ນປີນີ້ ຫຼາຍກວ່າ 2,3 ລ້ານຄົນ ເພີ່ມຂຶ້ນ 18% ເມື່ອທຽບໃສ່ໄລຍະດຽວກັນຂອງປີຜ່ານມາ ສ້າງລາຍຮັບໄດ້ຫຼາຍກວ່າ 700 ລ້ານໂດລາສະຫະລັດ. ໃນຂະນະນັ້ນ, ນັກທ່ອງທ່ຽວລາວ ບັນລຸ 2 ລ້ານຄົນ ເພີ່ມຂຶ້ນ 78% ສ້າງລາຍຮັບໄດ້ 332 ລ້ານກວ່າໂດລາສະຫະລັດ.
ໂຕເລກດັ່ງກ່າວ ຖືກລາຍງານໃນພິທີເປີດຊຸດຝຶກອົບຮົມຜູ້ນຳທ່ຽວແຫ່ງຊາດ ໂດຍມີ ທ່ານ ນາງ ດາຣານີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນປະທານ.
ຫຼັກສູດດັ່ງກ່າວໄດ້ດຳເນີນແຕ່ວັນທີ 9 ກັນຍາ ຫາວັນທີ 29 ພະຈິກ ແລະ ມີນັກສໍາມະນາກອນທັງໝົດ 89 ຄົນ, ໃນນັ້ນ ສາມາດເວົ້າພາສາອັງກິດໄດ້ 44 ຄົນ, ເວົ້າໄທ 36 ຄົນ, ເວົ້າພາສາຈີນ 10 ຄົນ, ສາມາດເວົ້າພາສາເກົາຫຼີໄດ້ 7 ຄົນ, ເວົ້າພາສາຝຣັ່ງ 5 ຄົນ, ເວົ້າພາສາຫວຽດນາມ 4 ຄົນ ແລະ 1 ຄົນ ສາມາດເວົ້າພາສາສະເປນໄດ້.
ຫຼັກສູດດັ່ງກ່າວມີຈຸດປະສົງເພື່ອຜະລິດກຸ່ມຜູ້ນຳທ່ຽວທີ່ມີຄວາມຮູ້ ແລະ ຄວາມສາມາດທີ່ຈຳເປັນ ແລະ ສາມາດສະແດງໃຫ້ເຫັນເຖິງຄວາມເຄົາລົບຕໍ່ວັດທະນະທຳຂອງລາວ ແລະ ສະຖານທີ່ທ່ອງທ່ຽວຫຼາຍແຫ່ງຂອງປະເທດ, ທັງທາງດ້ານປະຫວັດສາດ ແລະ ສາສະໜາ.
ທ່ານນາງ ດາຣານີ ກ່າວວ່າ ການທ່ອງທ່ຽວມີທ່າອ່ຽງເພີ່ມຂຶ້ນໃນປີນີ້ ແລະພວມຟື້ນຕົວຢ່າງໝັ້ນທ່ຽງຫຼັງຈາກໂລກລະບາດໂຄວິດ.
ບຸກຄະລາກອນທີ່ມີຄວາມສາມາດ ແມ່ນສິ່ງຈຳເປັນເພື່ອຮອງຮັບການຂະຫຍາຍຕົວຂອງການທ່ອງທ່ຽວ ແລະ ແກ້ໄຂການຂາດແຄນແຮງງານທີ່ມີຄວາມຊຳນານ ໃນດ້ານນີ້, ໂດຍສະເພາະແມ່ນພະນັກງານນໍາທ່ຽວ.
ທ່ານ ນາງ ດາລານີ ກ່າວອີກວ່າ: ຊຸດຝຶກອົບຮົມດັ່ງກ່າວ ມີຈຸດປະສົງເພື່ອສອນໃຫ້ຜູ້ເຂົ້າຮ່ວມຮູ້ກ່ຽວກັບຄຸນລັກສະນະພິເສດຕ່າງໆ ເພື່ອສະໜອງມາດຕະຖານການບໍລິການ ໃຫ້ນັກທ່ອງທ່ຽວມີປະສົບການທີ່ດີ, ມີຄວາມປະທັບໃຈ ແລະ ຢາກກັບຄືນປະເທດລາວ.
ເພື່ອຊຸກຍູ້ຈຳນວນນັກທ່ອງທ່ຽວໃນໄລຍະປີທ່ອງທ່ຽວລາວ 2024, ລັດຖະບານໄດ້ອະນຸມັດໃຫ້ນັກທ່ອງທ່ຽວຈາກບາງປະເທດເຂົ້າມາໂດຍບໍ່ມີວີຊາ ແລະ ໄດ້ເພີ່ມຈຳນວນມື້ທີ່ນັກທ່ອງທ່ຽວຈາກປະເທດເຫຼົ່ານີ້ສາມາດຢູ່ໃນລາວໄດ້, ໂດຍຈະມີກົດລະບຽບໃໝ່ໃນ ບັງຄັບແຕ່ວັນທີ 1 ກໍລະກົດ ຫາ ວັນທີ 31 ທັນວາ.
ທີ່ມ: https://www.vientianetimes.org.la/freefreenews/freecontent_175_Tourism_y24.php
