ບໍລິສັດ ຊີຈີເອັນ ເອເນີຈີ ເຕັກໂນໂລຢີ (ລາວ) ຈໍາກັດ ລົງນາມສັນຍາສໍາປະທານ ໂຄງການ ໄຟຟ້າພະລັງງານແສງຕາເວັນ 1.000 ເມກາວັດ ຢູ່ ເມືອງໄຊ ແລະ ເມືອງນາໝໍ້ ແຂວງອຸດົມໄຊ ໄລຍະທີ I ຂອງໂຄງການຖານເຊື່ອມຕໍ່ ພະລັງງານສະອາດພາກເໜືອຂອງລາວ ສະໜອງໄຟຟ້າ ໃຫ້ສາຍສົ່ງໄຟຟ້າ ລາວ-ຈີນ.
ຕາມການລາຍງານຂອງ ຂ່າວສານປະເທດລາວ, ພິທີດັ່ງກ່າວ ມີຂຶ້ນໃນວັນທີ 12 ກັນຍາ ທີ່ຜ່ານມານີ້, ໂດຍມີ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ນາງ ຟາງຮົງ ເອກອັກຄະລັດຖະທູດ ສປ ຈີນ ປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ໃຫ້ຮູ້ວ່າ: ໂຄງການຖານພະລັງງານສະອາດ ເຊື່ອມຕໍ່ພາກເໜືອຂອງລາວ ເປັນໂຄງການທີ່ສຳຄັນໃນການສະໜອງໄຟຟ້າ ໃຫ້ແກ່ສາຍສົ່ງໄຟຟ້າ 500kV ລະຫວ່າງ ລາວ-ຈີນ, ທັງເປັນໂຄງການຮ່ວມມືທີ່ສຳຄັນລະຫວ່າງ ລາວ-ຈີນ ໃນຂອບເຂດຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ແລະ ມີຄວາມໝາຍອັນໃຫຍ່ຫຼວງ ໃນການຊຸກຍູ້ການເຊື່ອມຈອດກັນດ້ານພະລັງງານໃນພາກພື້ນ, ຊຸກຍູ້ການພັດທະນາເສດຖະກິດຂອງທ້ອງຖິ່ນ, ປັບປຸງປະສິດທິພາບດ້ານພະລັງງານ, ຝຶກອົບຮົມບຸກຄະລາກອນດ້ານພະລັງງານສະອາດໃຫ້ກັບລາວ, ຫຼຸດຜ່ອນການປ່ອຍກາກບອນ, ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອລະຫວ່າງ ລາວ-ຈີນ.
ໂຄງການຖານພະລັງງານສະອາດ ເຊື່ອມຕໍ່ພາກເໜືອຂອງລາວ ແມ່ນການປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງ CGN ແລະ ເປັນໂຄງການສໍາຄັນໃນການສ້າງ “ຄູ່ຮ່ວມຊາຕາກໍາ ຈີນ-ລາວ”, ໂຄງການດັ່ງກ່າວ, ຕັ້ງຢູ່ໃນສາມແຂວງພາກເໜືອຂອງລາວ ຄື: ແຂວງອຸດົມໄຊ, ຜົ້ງສາລີ ແລະ ແຂວງ ຫລວງນ້ຳທາ ໂດຍມີແຜນຈະສ້າງຖານພະລັງງານສະອາດ ແບບປະສົມປະສານພະລັງງານລົມ, ພະລັງງານແສງຕາເວັນ ແລະ ພະລັງງານນໍ້າກັກເກັບ ທີ່ມີກຳລັງຕິດຕັ້ງລະດັບ 10 ລ້ານກິໂລວັດ.
ທ່ານ ຈ່າງ ຊາວສຸນ ປະທານບໍລິຫານບໍລິສັດ CGN International Holdings Co., Ltd ຂອງຈີນ ໄດ້ກ່າວວ່າ: ໂຄງການດັ່ງກ່າວ, ເປັນໂຄງການທີ່ມີຄຸນນະພາບສູງ ແລະ ເປັນໂຄງການຕົວແບບຂອງ ຈີນ-ລາວ ເພື່ອລົງເລິກການພັດທະນາຂອງພາກພື້ນ ແມ່ນໍ້າລ້ານຊ້າງ-ແມ່ນໍ້າຂອງ.
ທີ່ມາ: ຂປລ.
