ຜູ້ຊ່ຽວຊານ ຂອງອົງການອາຫານ ແລະ ການກະເສດ ແຫ່ງສະຫະປະຊາຊາດ (FAO) ປະຈຳລາວ ຊີ້ໃຫ້ເຫັນເຖິງ ໂອກາດ ແລະ ສັກກະຍະພາບທີ່ແຂງແຮງຂອງ ສປປ ລາວ ດຶງດູດການລົງທຶນຈາກຕ່າງປະເທດ ດ້ານການເຮັດກະສິກຳ ໂດຍສະເພາະການລ້ຽງງົວເພື່ອສົ່ງອອກໄປຈີນ ເພື່ອເປັນການກະຕຸ້ນການສົ່ງອອກ ສ້າງລາຍຮັບໃຫ້ແກ່ປະເທດຊາດ.
ທ່ານ ນາເຊີ ຮາຢັດ (Nasar Hayat) ຜູ້ຊ່ຽວຊານ FAO ປະຈຳລາວ ໄດ້ອະທິບາຍເຖິງໂອກາດ ແລະ ສິ່ງທ້າທາຍທີ່ ສປປ ລາວ ກຳລັງປະເຊີນຢູ່ໃນຂະນະນີ້. ໂດຍທ່ານ ນາເຊີ ຮາຢັດ ໃຫ້ສຳພາດກັບນັກຂ່າວ ເມື່ອບໍ່ດົນມານີ້ ວ່າ: “ແຂວງຢຸນນານປະເທດຈີນ ເປັນຕະຫຼາດສຳຄັນຂອງຈີນ ທີ່ມີທ່າແຮງບົ່ມຊ້ອນອັນແຂງແຮງໃຫ້ແກ່ຜູ້ປູກຝັງໃນລາວໃນການຜະລິດສິນຄ້າເພື່ອສົ່ງອອກ”
ຕົວແປສຳຄັນໃນການຊຸກຍູ້ການສົ່ງອອກສິນຄ້າຈາກລາວໄປຈີນກໍຄື ທາງລົດໄຟລາວ-ຈີນ ທີ່ສາມາດຂົນສົ່ງສິນຄ້າຈາກນະຄອນຫຼວງວຽງຈັນເຂົ້າໄປແຂວງຢຸນນານທີ່ຕັ້ງຢູ່ທາງຕອນໃຕ້ຂອງຈີນ ໄດ້ໃນເວລາພຽງ 1 ມື້ເທົ່ານັ້ນ.
ສິນຄ້າກະສິກຳ ຖືເປັນອີກໜຶ່ງທ່າແຮງໃນການສົ່ງອອກສິນຄ້າຂອງ ສປປ ລາວ, ສະເພາະປີ 2021 ສປປ ລາວ ມີລາຍໄດ້ຈາກການສົ່ງອອກສິນຄ້າກະສິກໍາເຖິງ 900 ລ້ານໂດລາ ສະຫະລັດ ໂດຍສົ່ງອອກຫຼາຍສຸດ ແມ່ນໝາກກ້ວຍ, ຢາງພາລາ, ມັນຕົ້ນ ແລະ ອື່ນໆ.
ທ່ານ ນາເຊີ ຜູ້ທີ່ເຮັດວຽກຮ່ວມກັບກະຊວງກະສິກຳ ແລະ ປ່າໄມ້ ຂອງ ສປປ ລາວ ຕັ້ງແຕ່ປີ 2018 ໃຫ້ຮູ້ອີກວ່າ: “ໃນໄລຍະທີ່ຜ່ານມາ ຂ້າພະເຈົ້າໄດ້ເຮັດວຽກກັບ 2-3 ບໍລິສັດ ເພື່ອຊຸກຍູ້ໃຫ້ເຂົາມາລົງທຶນຢູ່ລາວ ແລະ ມີຢ່າງໜ້ອຍ 1 ບໍລິສັດຈາກຕ່າງປະເທດຈະເຂົ້າມາລາວເພື່ອສ້າງຕັ້ງໂຮງງານປຸງແຕ່ງຊີ້ນ ແນໃສ່ສົ່ງອອກຊີ້ນ ໄປ ສປ ຈີນ ເຊິ່ງເປັນຕະຫຼາດທີ່ມີປະຊາກອນ 1,4 ຕື້ຄົນ. ນອກຈາກນີ້ຍັງມີບໍລິສັດ ກະສິກຳ ແລະ ເທັກໂນໂລຢີ ຈາກປະເທດ ອິດສະຣາເອວ ກໍຈະເຂົ້າມາລົງທຶນຢູ່ລາວ ເພື່ອອາໄສຜົນປະໂຫຍດຈາກທາງລົດໄຟລາວ-ຈີນ ທີ່ເປັນການເຊື່ອມຕໍ່ລາວ-ອາຊຽນ ແລະ ຢູໂຣບຫຼາຍຂຶ້ນ”
ເພື່ອເປັນການດຶງດູດການລົງທຶນຈາກບັນດາປະເທດ ອອສເຕຣເລຍ, ປາກີສະຖານ, ອິນເດຍ ແລະ ຈີນ, ລາວຕ້ອງປັບປຸງສະພາບແວດລ້ອມແຫ່ງການລົງທຶນ, ສ້າງຄວາມສາມາດຂອງປະຊາຊົນທ້ອງຖິ່ນໃນການຜະລິດສິນຄ້າເພື່ອສົ່ງອອກ ລາວຕ້ອງເຮັດໃຫ້ຫຼາຍກວ່າເກົ່າເພື່ອເຮັດໃຫ້ຕະຫຼາດໃນປະເທດ ແລະ ທ່າແຮງຂອງຕົນອອກສູ່ໂລກພາຍນອກ, ພ້ອມທັງແຈ້ງໃຫ້ບໍລິສັດຕ່າງປະເທດໃຫ້ຊາບວ່ານີ້ເປັນບ່ອນທີ່ດີທີ່ເຂົາເຈົ້າຈະລົງທຶນ.
ທ່ານ ນາເຊີ ຮາຢັດ ກ່າວອີກວ່າ: “ຂ້າພະເຈົ້າເຫັນວ່າ ໃນ 10 ປີຕໍ່ໜ້ານີ້ ລາວຈະກາຍເປັນສູນກາງການຂົນສົ່ງສິນຄ້າໃນພາກພື້ນ. ຂ້າພະເຈົ້າຫວັງວ່າປະລິມານການສົ່ງອອກສັດລ້ຽງ ແລະ ຜະລິດຕະພັນກະເສດອື່ນໆຈາກລາວໄປຈີນ ແລະ ບັນດາປະເທດໃນພາກພື້ນຈະເພີ່ມຂຶ້ນຢ່າງຫຼວງຫຼາຍ,”
ໃນປັດຈຸບັນ ເສັ້ນທາງລົດໄຟລາວ-ຈີນ ໄດ້ຫັນປ່ຽນໃຫ້ ສປປ ລາວ ຈາກປະເທດທີ່ບໍ່ມີຊາຍແດນຕິດຈອດກັບທະເລ ກາຍເປັນປະເທດທີ່ເຊື່ອມຕໍ່ກັນທາງບົກ (LandLock-LandLink) ຫັນປ່ຽນຈາກຈຸດທີ່ຕັ້ງພູມີສາດທີ່ດ້ອຍໂອກາດ ກາຍເປັນທີ່ຕັ້ງທາງພູມີສາດທີ່ໄດ້ປະໂຫຍດ ຈາກການຂົນສົ່ງ ແລະ ຍັງກາຍເປັນທ່າແຮງສຳຄັນໃນການຊຸກຍູ້ການທ່ອງທ່ຽວທັງພາຍໃນ ແລະ ຕ່າງປະເທດ.
ຂອບໃຈຂໍ້ມູນຈາກ: Lao National Television-English News Program, vientianetimes
ຕິດຕາມຂ່າວທັງໝົດຈາກ LaoX: https://laox.la/all-posts/
