ການຊື້ເຄື່ອງ ອອນລາຍ ຖ້າເວົ້າຮອດຄຳນີ້ປຸບ ບໍ່ວ່າຈະແມ່ນໃນອະດີດ ຈົນຮອດປັດຈຸບັນໃນຍຸກທີ່ເທັກໂນໂລຢີມີການພັດທະນາກ້າວໜ້າໄປໄກທັ່ງໃນໂລກ ແລະ ໃນບ້ານເຮົາ, ແຕ່ເຖິງແນວໃດກໍຕາມຄົນສ່ວນໃຫຍ່ກໍຍັງຄິດວ່າມັນເປັນເລື່ອງຍາກກັນຢູ່, ແຕ່ໃນຄວາມເປັນຈິງແລ້ວນັ້ນ ທ່ານຮູ້ແລ້ວຫຼືຍັງວ່າໃນປັດຈຸບັນນີ້ການຊື້ເຄື່ອງອອນລາຍແມ່ນມີຄວາມງ່າຍດາຍຫຼາຍ? ທຽບເທົ່າກັບຕ່າງປະເທດພຸ້ນລະ ຍ້ອນລະບົບທະນາຄານໃນບ້ານເຮົາມີການຮອງຮັບບັດ VISA, Paypal ແລະ ລະບົບການສົ່ງເຄື່ອງແມ່ນສາມາດສົ່ງມາຮອດລາວໄດ້ງ່າຍແລ້ວ. ສະນັ້ນຜູ່ຂຽນຈຶ່ງຂຽນບົດຄວາມນີ້ຂຶ້ນມາເພື່ອເປີດທາງໃຫ້ໃຜທີ່ກຳລັງສົນໃຈຢາກຊື້ເຄື່ອງອອນລາຍ ໄດ້ຮູ້ວິທີການປະຕິບັດແບບລະອຽດໆ ແລະ ແນະນຳໃຫ້ຜູ່ອື່ນຮູ້ຕໍ່ໆກັນ, ໂດຍບົດຄວາມນີ້ແມ່ນອີງຈາກປະສົບການຂອງຜູ່ຂຽນເອງ ທີ່ໄດ້ຊື້ເຄື່ອງອອນລາຍເປັນປະຈຳຢູ່ແລ້ວ. ບໍ່ເວົ້າຍາວ ເຮົາມາເລີ່ມກັນເລີຍ.
ກ່ອນທີ່ຈະເຂົ້າໄປເວົ້າເລື່ອງວິທີການຊື້ ຜູ່ຂຽນຢາກຝາກສິ່ງເລັກໆນ້ອຍວ່າ ກ່ອນທີ່ເຮົາຈະເລີ່ມຊື້ເຄື່ອງອີ່ຫຍັງຈັກຢ່າງອອນລາຍ ທ່ານຄວນຈະເລືອກຊື້ຈາກແຫຼ່ງ ຫຼື ເວັບທີ່ໜ້າເຊື່ອຖືໄດ້ສະເໝີ. ເວົ້າແນວນີ້ ອາດເຮັດໃຫ້ຫຼາຍທ່ານສົງໄສວ່າ: ແລ້ວຈະຮູ້ໄດ້ແນວໃດວ່າເວັບໃດໜ້າເຊື່ອຖື? ຄຳຕອບຂອງຄຳຖາມນີ້ແມ່ນຢູ່ໃນໂຕ "ອິນເຕີເນັດ" ເອງນັ້ນລະ, ແນະນຳໃຫ້ທ່ານຄົ້ນຄວ້າ, ສຶກສາກ່ຽວກັບເວັບທີ່ທ່ານຈະຊື້ນັ້ນເບິ່ງກ່ອນວ່າ ມີຄົນເຄີຍຊື້ບໍ່? ຊື້ແລ້ວມີບັນຫາບໍ່? ບໍລິການດີບໍ່ ຯລຯ. ແຕ່ບໍ່ແມ່ນວ່າເຮົາຈະຕ້ອງໄປຄົ້ນຫາອ່ານແນວນັ້ນຢູ່ທຸກເວັບນໍ້ ຍ້ອນແນວນີ້ການຊື້ຈາກເວັບດັງໆທີ່ໜ້າເຊື່ອຖືໄດ້ຢູ່ແລ້ວຢ່າງ Amazon, eBay ຈຶ່ງຖືເປັນທາງເລືອກທີ່ປອດໄພທີ່ສຸດ ແລະ ຜູ່ຂຽນແນະນຳສຳລັບມືໃໝ່ທີ່ຫາກໍແລ້ວຊື້ເຄື່ອງອອນລາຍ.
ສິ່ງທີ່ທ່ານຕ້ອງມີກ່ອນຈະເລີ່ມການຊື້ເຄື່ອງອອນລາຍມີ:

ອຸປະກອນທີ່ຈະໃຊ້ຊື້ເຄື່ອງອອນລາຍ ຄອມພິມເຕີ ຫຼື ມືຖື, ແທັບເລັດ ກໍວ່າໄປ.
ອິນເຕີເນັດ!
ເງິນສົດ $115.
ສຳມະໂນຄົວ ຫຼື ບັດປະຈຳໂຕ ຫຼື passport.
ຮູບ 3x4 ຫຼື 4x6 ຈຳນວນ 1 ໃບ.
ໂທລະສັບທີ່ມີລະບົບປະຕິບັດການ Android ຫຼື iOS ເພື່ອນຳໃຊ້ແອັບຯ BCEL One.
ເມື່ອມີຄົບຕາມດ້ານເທິງແລ້ວ ກໍມາລຸຍກັນໄດ້ເລີຍ. ໃນບົດຄວາມນີ້ແມ່ນຜູ່ຂຽນຈະແນະນຳວິທີສະໝັກບັນຊີທະນາຄານ ແລະ ບັດ VISA (Debit) ໄປຈົນຮອດສະໝັກບັນຊີ Paypal, ແລ້ວສັ່ງເຄື່ອງຈາກເວັບ eBay ໂດຍຈະຊຳລະເງິນຜ່ານທາງ Paypal ເຊິ່ງຈະຂໍແບ່ງອອກເປັນ 3 ພາກດັ່ງນີ້:

ພາກທີ 1: ການເປີດບັນຊີທະນາຄານ ແລະ ບັດ VISA (Debit)
ພາກທີ 2: ການເປີດບັນຊີ Paypal ແລະ ຜູກບັດ VISA ກັບ Paypal
ພາກທີ 3: ການຊື້ເຄື່ອງ, ຊຳລະເງິນ ແລະ ຂົນສົ່ງ

#ພາກທີ 1: ການເປີດບັນຊີທະນາຄານ ແລະ ບັດ VISA (Debit)#

ໃນບົດຄວາມນີ້ທະນາຄານທີ່ຜູ່ຂຽນແນະນຳໃຫ້ໃຊ້ໃນການຊື້ເຄື່ອງອອນລາຍນີ້ແມ່ນ ທະນາຄານ BCEL ເນື່ອງຈາກວ່າຮອງຮັບທັງບັດ VISA ແລະ ສາມາດຜູກບັດກັບ Paypal ໄດ້ນຳ ເຊິ່ງຈຳເປັນຕ້ອງໃຊ້ໃນການຊື້ເຄື່ອງໃນຫຼາຍເວັບເຊັ່ນ eBay ເປັນຕົ້ນ, ສຳລັບທະນາຄານອື່ນໆແມ່ນຍັງບໍ່ແນ່ໃຈວ່າຮອງຮັບ Paypal ແລ້ວຫຼືຍັງ. ໃນການເປີດບັນຊີທະນາຄານນີ້ແມ່ນງ່າຍດາຍຫຼາຍ ທ່ານພຽງແຕ່ນຳເອົາ ສຳມະໂນຄົວ ຫຼື ບັດປະຈຳໂຕ ຫຼື passport, ພ້ອມເງິນຈຳນວນ $115 ແລະ ຮູບ 3x4 ຫຼື 4x6 1 ໃບ ເຂົ້າໄປທີ່ທະນາຄານ BCEL ເພື່ອເປີດບັນຊີທະນາຄານເສຍກ່ອນ. ສຳລັບກໍລະນີນີ້ຜູ່ຂຽນແນະນຳໃຫ້ເປີດບັນຊີເປັນເງິນ ໂດລາ ($) ຈະດີກວ່າ ຈຶ່ງບໍ່ຕ້ອງເສຍປຽບເວລາມີການປ່ຽນສະກຸນເງິນໃນເວລາຊື້ເຄື່ອງ.
ໃນຕອນເປີດບັນຊີ ໃຫ້ບອກພະນັກງານພ້ອມວ່າຕ້ອງການບັດ VISA (Debit) ນຳ. ເງື່ອນໄຂການເປີດບັດ VISA (Debit) ນີ້ແມ່ນທ່ານຕ້ອງມີວົງເງິນໃນບັນຊີທະນາຄານຂອງທ່ານຢ່າງໜ້ອຍ $100, ພ້ອມເສຍຄ່າສະໝັກ $15, ນອກນັ້ນທ່ານຍັງຕ້ອງຄຳນຶງວ່າທ່ານຕ້ອງເສຍຄ່າບຳລຸງຮັກສາ $25 ໃນແຕ່ລະປີອີກດ້ວຍ. ຫຼັງຈາກສຳເລັດແລ້ວ ແມ່ນທ່ານຈະໄດ້ບັນຊີທະນາຄານຂອງທ່ານ ແຕ່ຕ້ອງລໍຖ້າອີກ 3 ມື້ ຈຶ່ງເຂົ້າໄປຮັບບັດ VISA ແລ້ວຈຶ່ງໃຊ້ງານໄດ້.
ໃນມື້ທີ່ທ່ານໄປຮັບບັດຢ່າລືມໃຫ້ພະນັກງານແນະນຳວິທີການໃຊ້ ແລະ ສະໝັກໃຊ້ແອັບຯ BCEL One ໃຫ້ພ້ອມ, ເພື່ອຈະໄດ້ສະດວກໃນຂັ້ນຕອນຕໍ່ໜ້າ.

ບັດ VISA (Debit) ແມ່ນຫຍັງ?

ອະທິບາຍໃຫ້ເຂົ້າໃຈງ່າຍທີ່ສຸດ ລະບົບບັດ debit ນີ້, ກໍຄ້າຍກັບການຕື່ມເງິນໂທລະສັບ ແຕ່ເຮົາຕື່ມໃສ່ບັດແທນ. ໝາຍຄວາມວ່າກ່ອນທ່ານຈະໃຊ້ບັດໄດ້ ແມ່ນທ່ານຕ້ອງເອົາເງິນໂອນເຂົ້າບັນຊີທະນາຄານຂອງທ່ານເສຍກ່ອນ ແລ້ວທ່ານສາມາດຈ່າຍເງິນຜ່ານບັດ VISA ໄດ້ຕາມຈຳນວນເງິນທີ່ມີໃນບັນຊີຂອງທ່ານ, ບໍ່ວ່າຈະຈ່າຍໂດຍກົງ ຫຼື ກົດຮັບເງິນສົດຜ່ານຕູ້ ATM. ຂໍ້ດີຂອງການໃຊ້ບັດ ແມ່ນທ່ານຈະບໍ່ຈຳເປັນຕ້ອງມີເງິນສົດຕິດໂຕໄວ້ເປັນຈຳນວນຫຼາຍ, ນອກນັ້ນ ບັດ VISA ຍັງຮອງຮັບໃນທົ່ວໂລກ ສະນັ້ນບໍ່ວ່າທ່ານຈະໄປໃສ? ຫາກທ່ານຕ້ອງການເງິນ ທ່ານກໍສາມາດໃຊ້ບັດ VISA ນີ້ ກົດຮັບເງິນຈາກຕູ້ ATM ທີ່ຮອງຮັບບັດ VISA ໄດ້ເລີຍ (ແຕ່ຢ່າງລືມວ່າ ຖ້າເງິນໃນບັນຊີບໍ່ມີ ກໍກົດເອົາມາໃຊ້ບໍ່ໄດ້ເດີ້ 😛).

ພາກທີ 2: ການເປີດບັນຊີ Paypal ແລະ ຜູກບັດ VISA ກັບ Paypal

(ຫາກໃຜບໍ່ໄດ້ມີແຜນຈ່າຍເງິນຜ່ານ PayPal ໃຫ້ຂ້າມຂັ້ນຕອນນີ້ໄປ)
ໝາຍເຫດ: ໃນຂັ້ນຕອນນີ້ແມ່ນຈຳເປັນສະເພາະໃນບາງເວັບທີ່ຮອງຮັບແຕ່ການຊຳລະເງິນຜ່ານທາງ Paypal ເທົ່ານັ້ນ ເຊັ່ນ: eBay ເປັນຕົ້ນ, ຫາກທ່ານບໍ່ມີຄວາມຕ້ອງການທີ່ຈະຊຳລະເງິນຜ່ານ Paypal ແມ່ນສາມາດຂ້າມຂັ້ນຕອນນີ້ໄປໄດ້.
ຫຼັງຈາກມີບັນຊີທະນາຄານ ແລະ ບັດ VISA ຂອງທ່ານເອງແລ້ວ, ຕໍ່ມາເຮົາມາເປີດບັນຊີ Paypal ກັນເລີຍ.
1. ກ່ອນອື່ນໃຫ້ທ່ານເຂົ້າໄປທີ່ paypal.com ທ່ານກໍຈະເຫັນໜ້າດັ່ງລຸ່ມນີ້

ໃຫ້ທ່ານຄລິກໄປທີ່ປຸ່ມ Sign Up ຢູ່ດ້ານຂວາເທິງ ເພື່ອເປີດບັນຊີໃໝ່
ເມື່ອກົດເຂົ້າມາທ່ານຈະຖືກນຳມາສູ່ໜ້າດັ່ງລຸ່ມນີ້:

ໃນຂັ້ນຕອນນີ້ໃນບ່ອນເລືອກປະເທດແມ່ນໃສ່ເປັນປະເທດລາວ Laos ເລີຍ (ສຳລັບຜູ່ຂຽນແມ່ນໃຊ້ເປັນບັນຊີໄທ ເພາະໃນແຕ່ກ່ອນແມ່ນຖ້າຫາກບັນຊີເປັນຂອງລາວ ແມ່ນຈະບໍ່ສາມາດຮັບເງິນໄດ້ ແຕ່ຈະສາມາດຈ່າຍເງິນອອກໄດ້ຢ່າງດຽວ).
ຫຼັງຈາກນັ້ນໃຫ້ທ່ານເລືອກປະເພດບັນຊີຂອງທ່ານ ໂດຍຈະມີໃຫ້ເລືອກ 3 ແບບຄື: ແບບສ່ວນບຸກຄົນ, ແບບພຣີເມຍ ແລະ ແບບທຸລະກິດ. ຫາກທ່ານບໍ່ແມ່ນຫ້າງຮ້ານ ຫຼື ບໍລິສັດໃດໆ ແມ່ນແນະນຳໃຫ້ເປີດເປັນແບບສ່ວນບຸກຄົນ ຫຼື Personal ໄດ້ເລີຍ.
ແຕ່ຫາກທ່ານມີຈຸດປະສົງຕ້ອງການໃຫ້ບັນຊີ ສາມາດຮັບເງິນ ຫຼື ຜູ່ອື່ນສາມາດໂອນເງິນເຂົ້າໄດ້ ແມ່ນທ່ານຈຳຕ້ອງຕັ້ງບັນຊີເປັນແບບພຣີເມຍ.
ໃນຂັ້ນຕອນນີ້ໃຫ້ທ່ານປ້ອນຂໍ້ມູນຕາມຄວາມຈິງ.

Email address ແມ່ນໃຫ້ໃສ່ອີເມວທີ່ທ່ານຈະໃຊ້ເປັນບັນຊີ Paypal ຂອງທ່ານ, ເມື່ອທ່ານຈະເຂົ້າສູ່ລະບົບ Paypal ໃນເທື່ອຕໍ່ໆໄປແມ່ນທ່ານຈະໃຊ້ຊື່ທີ່ຢູ່ອີເມວນີ້ ເພື່ອເຂົ້າສູ່ລະບົບ.
First Name/Last Name ໃຫ້ທ່ານໃສ່ຊື່ແທ້ ແລະ ນາມສະກຸນ.
ໃນພາກສ່ວນທີ່ຢູ່ ແມ່ນໃຫ້ທ່ານໃສ່ທີ່ຢູ່ຂອງທ່ານລົງໄປ
ສຳລັບລະຫັດໄປສະນີ ຫຼື Postcode ແມ່ນໃຫ້ໃສ່ 01000 ສຳລັບຂົງເຂດນະຄອນຫຼວງວຽງຈັນ
ສຳລັບເບີໂທ ແມ່ນໃຫ້ທ່ານປ້ອນເບີໂທລາວໃສ່ເລີຍ ເຊັ່ນ: 2099887788.
ເມື່ອສຳເລັດແລ້ວ ໃຫ້ກົດ "Agree and Create Account"
5. ຕໍ່ມາລະບົບຈະໃຫ້ທ່ານໃສ່ລະຫັດຢືນຢັນ ເພື່ອຄວາມປອດໄພ ກໍໃຫ້ພິມຕາມທີ່ເຫັນຢູ່ໃນຮູບດ້ານລຸ່ມ ແລ້ວກົດປຸ່ມ "Continue".

ຕໍ່ມາກໍລະບົບຈະບອກວ່າ ຍິນດີນຳ ທ່ານໄດ້ສ້າງບັນຊີສຳເລັດແລ້ວ. ມາເຖິງຂັ້ນຕອນນີ້ແມ່ນລະບົບຈະໃຫ້ທ່ານປ້ອນລະຫັດບັດຂອງທ່ານ ເພື່ອເພີ່ມບັດຂອງທ່ານ ເຂົ້າສູ່ລະບົບ Paypal ເພື່ອໃຫ້ສາມາດຊຳລະເງິນຈາກເງິນໃນບັດໄດ້.
ໃຫ້ທ່ານປ້ອນເລກບັດຂອງທ່ານລົງໃສ່ປ່ອງ "Credit card number". ຕໍ່ມາໃສ່ວັນທີໝົດອາຍຸຂອງບັດ. ໃນປ່ອງ CVV ແມ່ນໃຫ້ທ່ານໃສ່ເລກລະຫັດລັບ 3 ໂຕທີ່ຢູ່ດ້ານຫຼັງຂອງບັດຂອງທ່ານ. ເມື່ອສຳເລັດແລ້ວໃຫ້ກົດປຸ່ມ "Continue".
1. ເມື່ອສຳເລັດແລ້ວ ລະບົບຈະນຳທ່ານເຂົ້າສູ່ໜ້າບັນຊີ Paypal ຂອງທ່ານດັ່ງຮູບດ້ານລຸ່ມ.

ເມື່ອມາຮອດຂັ້ນຕອນນີ້ ໃຫ້ທ່ານເຂົ້າໄປກວດເບິ່ງອີເມວທີ່ທ່ານໃຊ້ສະໝັກບັນຊີ Paypal ເສຍກ່ອນ, ເພາະລະບົບໄດ້ສົ່ງອີເມວ ເພື່ອຢືນຢັນບັນຊີຂອງທ່ານໄປໃຫ້ທາງອີເມວ.
ທ່ານຈະເຫັນມີອີເມວສົ່ງມາໃນຊື່ເລື່ອງ Activate your new PayPal account, ເມື່ອເປີດເຂົ້າມາໃຫ້ທ່ານກົດປຸ່ມ Activate My Account ດັ່ງຮູບ

ຫຼັງຈາກກົດປຸ່ມດັ່ງກ່າວ ທ່ານຈະຖືກຖາມໃຫ້ໃສ່ລະຫັດຜ່ານຂອງບັນຊີ Paypal ຂອງທ່ານ. ໃຫ້ທ່ານປ້ອນເຂົ້າໄປແລ້ວກົດ Login.
ຕໍ່ມາລະບົບຈະໃຫ້ທ່ານຕັ້ງຄຳຖາມ ແລະ ຄຳຕອບລັບ 2 ຂໍ້ ເພື່ອໃຊ້ກູ້ບັນຊີ ໃນກໍລະນີລືມລະຫັດຜ່ານ ຫຼື ອຸບັດຕິເຫດອື່ນໆ. ໃຫ້ທ່ານເລືອກຄຳຖາມ ແລະ ໃສ່ຄຳຕອບຕາມຕ້ອງການ. ເມື່ອໃສ່ແລ້ວ ກ່ອນຈະກົດປຸ່ມ "Submit" ຜູ່ຂຽນແນະນຳວ່າໃຫ້ທ່ານຖ່າຍຮູບ ຫຼື ຖ່າຍ screenshot ແລ້ວເກັບຮັກສາໄວ້ກັນລືມ ເພາະຄຳຖາມທັງ 2 ຂໍ້ນີ້ ແມ່ນສຳຄັນຫຼາຍ. ຫຼັງຈາກກົດປຸ່ມ Submit ບັນຊີຂອງທ່ານກໍຖືວ່າພ້ອມໃຊ້ງານແລ້ວ.
ຫຼັງຈາກຂັ້ນຕອນດ້ານເທິງ ໃຫ້ທ່ານກົດເຂົ້າໜ້າ My Account. ແລ້ວທ່ານຈະເຫັນວ່າ ບັນຊີຂອງທ່ານຍັງເປັນສະຖານະບໍ່ຖືກຢືນຢັນເທື່ອ (ດັ່ງຮູບ)

ໃຫ້ທ່ານກົດໃສ່ປຸ່ມ "Get verified" ເພື່ອຢືນຢັນບັນຊີຂອງທ່ານ ເຊິ່ງມັນກໍຄືກັນຜູກບັນຊີຂອງທ່ານ ກັບ ບັດ VISA ຂອງທ່ານນັ້ນເອງ.
ເມື່ອກົດໃສ່ປຸ່ມ "Get verified" ທ່ານຈະຖືກນຳມາສູ່ໜ້າຕໍ່ໄປດັ່ງລຸ່ມນີ້:

ລະບົບຈະບອກທ່ານວ່າ ເຂົາຈະທົດສອບຄິດໄລ່ເງິນ $1.95 ຈາກບັດຂອງທ່ານ ເພື່ອກວດສອບວ່າບັດນີ້ແມ່ນຂອງທ່ານ ແລະ ຈະຄືນເງິນຈຳນວນນີ້ໃຫ້ພາຍໃນ 24 ຊົ່ວໂມງ ເມື່ອບັດຂອງທ່ານຖືກຢືນຢັນແລ້ວ.
ເມື່ອເຂົ້າໃຈແລ້ວ ໃຫ້ທ່ານກົດປຸ່ມ "Continue" ໄດ້ເລີຍ.
11. ຕໍ່ມາໃຫ້ທ່ານເປີດ Wi-Fi ຫຼື ອິນເຕີເນັດໃນໂທລະສັບ ຫຼື ແທັບເລັດຂອງທ່ານທີ່ໄດ້ລົງແອັບຯ BCEL One ໄວ້ຢູ່, ລໍຖ້າບຶດນຶ່ງ ມັນຈະແຈ້ງວ່າທ່ານໄດ້ຮັບຂໍ້ຄວາມໃໝ່. ຫຼັງຈາກນັ້ນໃຫ້ທ່ານເປີດແອັບຯ BCEL One ຂຶ້ນມາ ແລ້ວເຂົ້າໄປທີ່ແຖບຂໍ້ຄວາມ ທ່ານກໍຈະເຫັນ 2 ຂໍ້ຄວາມໃໝ່ດັ່ງຮູບ

ເມື່ອທ່ານເປີດຂໍ້ຄວາມຂຶ້ນມາ, ນຶ່ງໃນນັ້ນຈະມີຂໍ້ຄວາມນຶ່ງທີ່ມີລະຫັດຕິດມາພ້ອມ ດັ່ງຮູບດ້ານລຸ່ມ.
ໃຫ້ທ່ານຈົດລະຫັດ 4 ໂຕນັ້ນໄວ້. ແລ້ວເປີດໜ້າ My Account ຂອງ Paypal ຂອງທ່ານຂຶ້ນມາ. ແລ້ວກົດໄປທີ່ Confirm my debit or credit card ດັ່ງຮູບ
ເມື່ອກົດເຂົ້າໄປລະບັບຈະໃຫ້ທ່ານປ້ອນລະຫັດ 4 ໂຕເລກ, ໃຫ້ທ່ານປ້ອນລະຫັດ 4 ໂຕເລກທີ່ໄດ້ຈົດໄວ້ໃນຂັ້ນຕອນທີ 12, ແລ້ວກົດປຸ່ມ "Confirm Card".

ຫາກປ້ອນໃສ່ຖືກຕ້ອງ ບັດ VISA ຂອງທ່ານ ແມ່ນຈະຖືກຜູກເຂົ້າກັບບັນຊີ Paypal ຂອງທ່ານ ແລະ ບັນຊີຂອງທ່ານກໍຈະຖືກປ່ຽນເປັນສະຖານະໄດ້ຮັບການຢືນຢັນແລ້ວ.

ມາຮອດນີ້ກໍຖືວ່າສຳເລັດແລ້ວ ສຳລັບການສ້າງບັນຊີ Paypal ແລະ ຜູກບັດເຂົ້າກັບບັນຊີ Paypal.

ພາກທີ 3: ການຊື້ເຄື່ອງ, ຊຳລະເງິນ ແລະ ຂົນສົ່ງ

ໃນຂັ້ນຕອນນີ້ແມ່ນທ່ານຕ້ອງສະໝັກບັນຊີຜູ່ໃຊ້ຂອງເວັບ eBay ກັນກ່ອນ, ເຊິ່ງໃນພາກສ່ວນນີ້ແມ່ນຜູ່ຂຽນຈະຂໍຂ້າມໄປ ເພື່ອບໍ່ໃຫ້ບົດຄວາມນີ້ຍາວໄປກວ່ານີ້ນໍ້.
ຫຼັງຈາກທ່ານສະໝັກແລ້ວ ໃຫ້ທ່ານປະຕິບັດຕາມຂັ້ນຕອນດັ່ງລຸ່ມນີ້ເລີຍ:
1. ກ່ອນອື່ນເລີຍທ່ານເຂົ້າໄປທີ່ເວັບ ebay.com ແລ້ວເລືອກເຄື່ອງທີ່ທ່ານຕ້ອງການຊື້. ຕົວຢ່າງດັ່ງຮູບ:

ໝາຍເຫດ: ອີງຕາມແຈ້ງການຈາກກະຊວງໄປສະນີ ສິນຄ້າທີ່ມີແບັດເຕີຣີເຊັ່ນ: ໂທລະສັບມືຖື, ໂນດບຸກ ຯລຯ ແມ່ນຈະບໍ່ສາມາດນຳສົ່ງເຂົ້າລາວໄດ້. ສະນັ້ນແນະນຳໃຫ້ຫລີກລ້ຽງການຊື້ເຄື່ອງປະເພດນີ້ອອນລາຍ.
2. ກົດ Buy It Now ເລີຍຫາກທ່ານຕ້ອງການຊື້ຕອນນີ້.

ເມື່ອກົດເຂົ້າມາທ່ານຈະເຫັນໜ້າດັ່ງລຸ່ມນີ້. ໃນຈຸດນີ້ໃນບ່ອນ Ship to ແມ່ນຈະສະແດງທີ່ຢູ່ສຳລັບສົ່ງພັດຊະດຸ ຫາກທ່ານໄດ້ໃສ່ໄປກ່ອນໜ້ານີ້ແລ້ວ ມັນຈະສະແດງຢູ່ບ່ອນນີ້.
ເພື່ອກວດສອບໃຫ້ໝັ້ນໃຈວ່າທ່ານໃສ່ຖືກຕ້ອງແລ້ວ ດຽວຜູ່ຂຽນຈະແນະນຳໄປແຕ່ລະອັນເລີຍ. ກ່ອນອື່ນໃຫ້ທ່ານກົດໃສ່ປຸ່ມ Change shipping address ກ່ອນ, ແລ້ວຈະມີໜ້າສະແດງມາດັ່ງຮູບ:

Country or region: Laos
Contact Name: ໃສ່ຊື່ນາມສະກຸນຂອງທ່ານ
Street address: ໃສ່ເລກໜ່ວຍ/ເຮືອນເລກທີ, ບ້ານ
Street address 2: ໃສ່ຖະໜົນທີ່ທ່ານຢູ່, ຕໍ່ມາເພື່ອຄວາມສະດວກສຳລັບໄປສະນີ ເພື່ອຕິດຕໍ່ຫາທ່ານໃນການສົ່ງເຄື່ອງ ຫຼື ໃຫ້ທ່ານເຂົ້າໄປຮັບເຄື່ອງ ຜູ່ຂຽນແນະນຳໃຫ້ໃສ່ເບີໂທຢູ່ບ່ອນນີ້, ເພາະຖ້າບໍ່ມີເບີໂທຢູ່ກ່ອງພັດສະດຸໄປສະນີ ທ່ານອາດຈະບໍ່ໄດ້ຮັບພັດສະດຸຂອງທ່ານ.
City: ເມືອງທີ່ທ່ານຢູ່
State: ແຂວງທີ່ທ່ານຢູ່
Zip code: ລະຫັດໄປສະນີແມ່ນໃສ່ເປັນ 01000 ສຳລັບນະຄອນຫຼວງ
Phone number: ໃສ່ເບີໂທລະສັບຂອງທ່ານ (ສຳລັບເບີໂທນີ້ ບາງຜູ່ຂາຍຈະບໍ່ພິມເບີໂທນີ້ໃສ່ກ່ອງເຄື່ອງຂອງທ່ານ ຍ້ອນເຫດຜົນຄວາມເປັນສ່ວນຕົວ ຍ້ອນແນວນັ້ນຜູ່ຂຽນຈຶ່ງແນະນຳໃຫ້ທ່ານໃສ່ເບີໂທຕໍ່ທ້າຍໃສ່ບ່ອນ Street address 2 ດັ່ງທີ່ກ່າວມາດ້ານເທິງ)
ເມື່ອທ່ານໃສ່ຂໍ້ມູນຖືກຕ້ອງແລ້ວ ໃຫ້ທ່ານກົດປຸ່ມ Ship to this address. ແລ້ວກົດປຸ່ມ Continue ທີ່ຢູ່ດ້ານຂວາ ດັ່ງຮູບ:

ເມື່ອກົດແລ້ວ ທ່ານຈະຖືກນຳມາສູ່ລະບົບ Paypal ພ້ອມທັງຖາມໃຫ້ໃສ່ຊື່ບັນຊີ Paypal ພ້ອມທັງລະຫັດຜ່ານດັ່ງຮູບດ້ານລຸ່ມ. ໃຫ້ທ່ານປ້ອນເຂົ້າໄປ ແລ້ວກົດ Log In
ລະບົບຈະສະແດງລາຍລະອຽດຕ່າງໆເຊັ່ນ: ທີ່ຢູ່ສຳລັບສົ່ງພັດສະດຸໄປຫາ, ຈຳນວນເງິນທີ່ຈະຄິດໄລ່ ຯລຯ. ເມື່ອທ່ານເຫັນວ່າຖືກຕ້ອງໝົດແລ້ວ ໃຫ້ກົດ Confirm and Pay ກໍຖືວ່າສຳເລັດການຊື້ເຄື່ອງໃນ eBay ແລ້ວ.

ໂດຍປົກກະຕິແລ້ວການສົ່ງເຄື່ອງມາປະເທດລາວ ແມ່ນຈະໃຊ້ເວລາ 7 ມື້ຂຶ້ນໄປ (ສ່ວນໃຫຍ່ແມ່ນ 7-10 ມື້ ຫຼື ອາດຮອດ 20 ມື້) ຂຶ້ນກັບປະເພດຂອງການຈັດສົ່ງ. ຖ້າສົ່ງແບບ FedEx ຫຼື DHL ແມ່ນຈະມາຮອດໄວເຖິງຂັ້ນສັ່ງມື້ນີ້ ໄດ້ມື້ອື່ນກັນເລີຍ ແຕ່ແນ່ນອນລາຄາຂົນສົ່ງຕ້ອງແພງຂຶ້ນໄປນຳ. ຫາກທ່ານເຮັດຕາມຜູ່ຂຽນແນະນຳ ໂດຍລະບຸເບີໂທໄວ້ໃນທີ່ຢູ່ແລ້ວນັ້ນ ເມື່ອເຄື່ອງມາຮອດໄປສະນີລາວ, ທາງຫ້ອງການເພິ່ນຈະໂທຫາໃຫ້ໄປຮັບເຄື່ອງ ຫຼື ເຮົາຈະໃຫ້ເພິ່ນມາສົ່ງໃຫ້ຮອດບ້ານກໍໄດ້ ແຕ່ຕ້ອງອາດຕ້ອງເສຍຄ່າສົ່ງ ຫຼື ຄ່າທຳນຽມຕັ້ງແຕ່ 5,000 - 25,000 ກີບ ຂຶ້ນກັບປະເພດເຄື່ອງ ແລະ ປະເພດການສົ່ງ (ຜູ່ຂຽນແມ່ນໄປເອົາຢູ່ໄປສະນີດ້ວຍຕົນເອງ). ຫາກເວລາຜ່ານໄປເກີນ 20 ມື້ ແລ້ວເຄື່ອງຍັງບໍ່ຮອດ ທ່ານສາມາດເຂົ້າໄປກວດຢູ່ໄປສະນີໄດ້ ໂດຍພຽງບອກຊື່ ນາມສະກຸນຂອງທ່ານ ຫຼື ນຳ Tracking Number ໄປນຳ ແລ້ວທາງໄປສະນີຈະກວດໃຫ້.
ຫາກເຄື່ອງຍັງບໍ່ຮອດໄປສະນີ ແມ່ນທ່ານສາມາດຕິດຕໍ່ກັບໄປຫາຜູ່ຂາຍໄດ້ວ່າ ຍັງບໍ່ໄດ້ຮັບເຄື່ອງ, ຜູ່ຂາຍຈະທຳການສົ່ງເຄື່ອງມາໃຫ້ໃໝ່ ຫຼື ຄືນເງິນໃຫ້ທ່ານ ແລ້ວແຕ່ທ່ານຈະຕົກລົງກັບຜູ່ຂາຍ.
ມາຮອດນີ້ກໍຖືວ່າຈົບແລ້ວສຳລັບບົດຄວາມນີ້. ກໍຫວັງວ່າມັນຈະຊ່ອຍໃຫ້ບັນດາທ່ານຮູ້ວິທີການຊື້ເຄື່ອງອອນລາຍໄດ້ດີຂຶ້ນ ແລ້ວກໍຂໍໃຫ້ທຸກທ່ານຈົ່ງມ່ວນຊື່ນກັບການຊື້ເຄື່ອງອອນລາຍເດີ້.

ຫາກທ່ານຊື້ເຄື່ອງອອນລາຍໃຫ້ຜູ່ນຶ່ງ ຜູ່ນັ້ນຈະໄດ້ເຄື່ອງ 1 ຢ່າງ.
ຫາກທ່ານສອນຜູ່ນັ້ນຊື້ເຄື່ອງອອນລາຍ ລາວຜູ່ນັ້ນຈະຊື້ເຄື່ອງອອນລາຍໄດ້ຫຼາຍຢ່າງ
~ ນັກປາດຄົນນຶ່ງບໍ່ໄດ້ກ່າວໄວ້