ລັດຖະບານໄທຕ້ອງການຈຳກັດການຂາຍສິນຄ້າລາຄາຖືກຈາກຈີນ ທາງອິນເຕີແນັດເພື່ອປົກປ້ອງທຸລະກິດພາຍໃນປະເທດທີ່ໄດ້ຮຽກຮ້ອງໃຫ້ມີການອຸດໜູນ ປົກປ້ອງ ຈາກພາກລັດໃຫ້ຫຼາຍຂຶ້ນ.
ລັດຖະບານໄທ ໄດ້ຮຽກຮ້ອງໃຫ້ບັນດາໜ່ວຍງານຕ່າງໆ ນຳໃຊ້ມາດຕະການຕ່າງໆເພື່ອຢຸດຕິການນຳເຂົ້າທີ່ໜ້າສົງໄສ, ໃນນັ້ນມີການກວດກາການອອກໃບອະນຸຍາດ ແລະ ການຂຶ້ນທະບຽນຢ່າງເຂັ້ມງວດ, ການຊຳລະເງິນ ແລະ ການຄວບຄຸມຄຸນນະພາບ.
ກ່ອນໜ້ານີ້, ລັດຖະບານໄດ້ຂະຫຍາຍການເກັບພາສີມູນຄ່າເພີ່ມ 7% ເພື່ອລວມເອົາສິນຄ້ານໍາເຂົ້າທັງໝົດທີ່ມີລາຄາຕໍ່າກວ່າ 1,500 ບາດ ($42.91), ເຊິ່ງກ່ອນໜ້ານີ້ໄດ້ຮັບການຍົກເວັ້ນ.
ກະຊວງການຄ້າໄທມີແຜນທີ່ຈະຈຳກັດປະລິມານ ແລະ ມູນຄ່າສິນຄ້າທີ່ນຳເຂົ້າທາງອອນລາຍປະຈຳປີ. ທ່ານ ໄຊ ວັດຊະລົງ ໂຄສົກ ລັດຖະບານໄທ ກ່າວ ວ່າ “ມີການໄຫຼເຂົ້າຂອງຜະລິດຕະພັນນໍາເຂົ້າທາງອອນລາຍໃນລະດັບທີ່ສູງຜິດປົກກະຕິ ເຊິ່ງມັນໄດ້ກະທົບຕໍ່ຜູ້ຜະລິດທ້ອງຖິ່ນຂອງພວກເຮົາຢ່າງຮຸນແຮງ, ໂດຍສະເພາະແມ່ນວິສາຫະກິດຂະໜາດນ້ອຍແລະຂະໜາດກາງ, ພວກເຮົາບໍ່ພໍໃຈກັບເລື່ອງນີ້.”
ການໄຫຼເຂົ້າຂອງສິນຄ້າຂອງຈີນໄດ້ເພີ່ມຄວາມທ້າທາຍທີ່ກໍາລັງປະເຊີນກັບເສດຖະກິດຂອງປະເທດໄທ. ການຂະຫຍາຍຕົວທີ່ບັນທຶກໄວ້ພຽງແຕ່ 1.5% ໃນໄຕມາດທໍາອິດ ແລະ ມີການປິດໂຮງງານເກືອບ 2,000 ໂຮງງານໃນປີທີ່ຜ່ານມາ.
ປະຈຸບັນ, ບັນດາວິສາຫະກິດພວມຮຽກຮ້ອງໃຫ້ມີການຊ່ວຍເຫຼືອ ແລະ ສະໜັບສະໜູນ ຈາກລັດຖະບານທີ່ສູງຂຶ້ນເພື່ອຊ່ວຍຊຸກຍູ້ການຜະລິດຢູ່ທ້ອງຖິ່ນ.
ທ່ານ ກຽງໄກ ທຽນນູກຸນ ປະທານສະຫະພັນອຸດສາຫະກໍາໄທ ກ່າວວ່າ: ປັດຈຸບັນບໍລິສັດທີ່ຜະລິດໃນປະເທດໄທ ແລະ ເຂົ້າຮ່ວມການປະມູນການຈັດຊື້ຂອງລັດໄດ້ຮັບເງິນອຸດຫນູນ 5% ໃນປະຈຸບັນ, ເຮັດໃຫ້ພວກເຂົາມີຄວາມໄດ້ປຽບເລັກນ້ອຍກວ່າບໍລິສັດຕ່າງປະເທດ, ແຕ່ບໍ່ພຽງພໍທີ່ຈະສ້າງຄວາມແຕກຕ່າງ.
ທ່ານ ກຽງໄກ ກ່າວຕໍ່ວ່າ: “ພວກເຮົາຈໍາເປັນຕ້ອງໄດ້ປັບຂຶ້ນຊົ່ວຄາວ ໃນໄລຍະ 2-3 ປີຈາກ 5% ເປັນ 20% ນີ້ຈະເປັນເຮັດໃຫ້ມີເງິນທີ່ແທ້ຈິງທີ່ໄຫຼວຽນຢູ່ໃນລະບົບທີ່ສາມາດຊຸກຍູ້ເສດຖະກິດຢ່າງຫຼວງຫຼາຍ.”
ລັດຖະບານຕ້ອງປົກປັກຮັກສາທຸລະກິດທ້ອງຖິ່ນໃຫ້ດີຂຶ້ນໃນໄລຍະຍາວ, ຖ້າບໍ່ດັ່ງນັ້ນພວກເຂົາເຈົ້າຈະຢູ່ບໍ່ລອດ ຈາກ ຄື້ນຊູນາມິ ຂອງສິນຄ້າລາຄາຖືກຈາກຈີນ, ທ່ານ ກຽງໄກ ກ່າວ.
ມາຮອດເດືອນມິຖຸນາປີນີ້, ມີ 660 ກວ່າໂຮງງານ, ຕົ້ນຕໍແມ່ນຂະແໜງ SME ໄດ້ປິດຕົວຢູ່ໄທ, ເພີ່ມຂຶ້ນ 86% ເມື່ອທຽບໃສ່ໄລຍະດຽວກັນຂອງປີກາຍ.
