ໜັງສືພິມ ກຸງເທບ ທຸລະກິດລາຍງານວ່າ ເມື່ອບໍ່ດົນມານີ້ ໂຮງງານໃນໄທ ປິດຕົວໄປ 2,000 ກວ່າແຫ່ງ ສົ່ງຜົນກະທົບຕໍ່ພາກການຜະລິດໃນປະເທດ ເຊິ່ງກວມເອົາເກືອບ 1 ໃນ 4 ຂອງ GDP ຂອງປະເທດ ຫຼັງສູ້ສິນຄ້າລາຄາຖືກຈາກຕ່າງປະເທດບໍ່ໄດ້.
ໂດຍ ກຸງເທບທຸລະກິດ ລາຍງານຂໍ້ມູນຈາກ ກົມອຸດສາຫະກຳ ແຫ່ງປະເທດໄທ ລະບຸວ່າ ການປິດໂຮງການໃນໄທ ເດືອນກໍລະກົດ 2023 ຫາເດືອນມິຖຸນາ 2024 ເພີ່ມຂຶ້ນ 40% ເມື່ອທຽບໃສ່ 12 ເດືອນກ່ອນ. ດັ່ງນັ້ນ, ຈໍານວນຄົນວ່າງງານເພີ່ມຂຶ້ນ 80% ໃນໄລຍະດຽວກັນ ແລະ ມີຄົນງານຫຼາຍກວ່າ 51,500 ກາຍເປັນຄົນວ່າງງານ.
ຂະນະດຽວກັນ, ຈໍານວນການເປີດໂຮງງານໃໝ່ກໍຫຼຸດລົງ, ໂຮງງານໃຫຍ່ໆເລີ່ມປິດຕົວລົງ ຂະນະດຽວກັນ, ໂຮງງານຂະໜາດນ້ອຍໆຂຶ້ນມາເປີດແທນ ນອກຈາກນັ້ນ, ຜົນກະທົບໄດ້ແຜ່ລາມໄປສູ່ອຸດສາຫະກໍາຕ່າງໆທີ່ເປັນກຳລັງຂັບເຄື່ອນທີ່ສຳຄັນຂອງເສດຖະກິດ ລວມທັງອຸດສາຫະກໍາລົດ.
ທ່ານ ແສນໄທ ວິລະກຸນ ປະທານສະມາຄົມ SME ແຫ່ງປະເທດໄທ ກ່າວວ່າ: ຜູ້ຜະລິດຂະໜາດນ້ອຍກຳລັງປະເຊີນກັບບັນຫາຕົ້ນທຶນການຜະລິດທີ່ເພີ່ມຂຶ້ນ. ຍ້ອນລາຄານ້ຳມັນເພີ່ມຂຶ້ນ ແລະ ຄ່າຈ້າງຂ້ອນຂ້າງສູງ ບໍ່ພຽງແຕ່ເທົ່ານັ້ນ ຍັງຕ້ອງແຂ່ງຂັນກັບບໍລິສັດຂ້າມຊາດ ຜູ້ຜະລິດທີ່ບໍ່ສາມາດປັບຕົວໄດ້ໄວ ເຮັດໃຫ້ທຸລະກິດຕ້ອງຖືກປິດ ຫຼື ປ່ຽນໄປຜະລິດອັນອື່ນແທນ.
ນອກຈາກນີ້ ຮອງປະທານ ສະພາອຸດສາຫະກຳ ຂອງໄທ ຍັງໄດ້ຮຽກຮ້ອງໃຫ້ ລັດຖະບານພິຈາລະນາ ຫາວິທີປ້ອງກັນ ການລັກລອບໜີພາສີນໍາເຂົ້າ. ທ່າມກາງສົງຄາມການຄ້າລະຫວ່າງສະຫະລັດ ແລະ ຈີນ.
https://www.bangkokbiznews.com/business/1135836?anf=
ຕິດຕາມຂ່າວທັງໝົດຈາກ LaoX: https://laox.la/all-posts/
