ໂດຍປົກກະຕິແລ້ວ ເມື່ອເວົ້າເຖິງຄວາມຮັກ ຫຼາຍຄົນມັກຄິດເຖິງຄວາມຮັກທີ່ເຮົາມີຕໍ່ຄົນອື່ນ ຫຼື ຄວາມຮັກທີ່ເຮົາໄດ້ຮັບຈາກຄົນອື່ນ ເຊັ່ນ: ພໍ່ແມ່, ພີ່ນ້ອງ, ໝູ່ເພື່ອນ, ຄູອາຈານ, ແລະ ຄົນຮັກ ກັນແມ່ນບໍ?
ເຊື່ອວ່າຫຼາຍຄົນຄົງເຄີຍໄດ້ຍິນຄຳວ່າ: “ຖ້າເຈົ້າຍັງບໍ່ຮູ້ຈັກຮັກຕົນເອງ ເຈົ້າຈະຮັກຄົນອື່ນໄດ້ແນວໃດ?” ຫຼື “ເມື່ອເຈົ້າຮັກຕົນເອງຫຼາຍພໍ ເຈົ້າຈະສົ່ງຄວາມຮັກໃຫ້ແກ່ຄົນອື່ນໄດ້.” ເຊິ່ງມັນໝາຍຄວາມວ່າ: ການຮຽນຮູ້ຄວາມຮັກໂດຍການເຮັດສິ່ງທີ່ດີໃຫ້ກັບຕົນເອງກ່ອນທີ່ຈະເຜີຍແຜ່ຄວາມຮັກໃຫ້ຄົນອື່ນ. ເພາະຄົນທີ່ຮັກຕົນເອງຈະສາມາດສ້າງຄວາມສຸກ ແລະ ເຕີມເຕັມໃຫ້ຕົນເອງຢ່າງບໍ່ຢຸດຢັ້ງ ພ້ອມທັງມີຄວາມຮັກອັນບໍລິສຸດທີ່ຈະມອບໃຫ້ຄົນອື່ນນັ້ນເອງ.
ໃນເມື່ອເຮົາເກີດມາເພື່ອໃຊ້ຊີວິດໃນສັງຄົມ ຄົນເຮົາຍ່ອມຕ້ອງຮຽນຮູ້ທີ່ຈະຮັກຕົນເອງ ເພາະຫາກວ່າໃນມື້ທີ່ບໍ່ມີໃຜຮັກເຮົາ ແລະ ເຮົາບໍ່ຮັກຕົນເອງ ຊີວິດຈະດໍາເນີນຕໍ່ໄປໄດ້ແນວໃດ? ສະນັ້ນ, ຖ້າຢາກມີຄວາມສຸກ ແລະ ປະສົບຜົນສຳເລັດ, ຕ້ອງເລີ່ມຕົ້ນດ້ວຍ “ຮັກຕົນເອງກ່ອນຄິດຮັກຄົນອື່ນ.”
•ຢ່າຄາດຫວັງຄວາມຮັກຈາກຜູ້ອື່ນ ຖ້າເຈົ້າບໍ່ສາມາດໃຫ້ຄວາມຮັກກັບຕົນເອງໄດ້.
ເມື່ອເວົ້າເຖິງຄວາມຮັກ, ແນ່ນອນບາງຄັ້ງເຮົາກໍອາດເກີດຄວາມຄາດຫວັງ. ໂດຍສະເພາະໃນເວລາທີ່ເຮົາຮັກຄົນອື່ນ ຍ່ອມມີຄາດຫວັງວ່າຄົນນັ້ນຕ້ອງມອບຄວາມຮັກໃຫ້ເຮົາ ເປັນການຕອບແທນ ເຊິ່ງວ່າມັນມີຄວາມເປັນໄປໄດ້ວ່າຈະ “ສົມຫວັງ ຫຼື ຜິດຫວັງ” . ສະນັ້ນ, ຢຸດຄາດຫວັງວ່າຕ້ອງໃຫ້ຄົນອື່ນມາຮັກເຈົ້າ ເພາະມັນເປັນສິ່ງທີ່ເຮົາຄວບຄຸມບໍ່ໄດ້. ແຕ່ສິ່ງທີ່ເຮົາເຮັດໃຫ້ກໍຄື: “ຮັກຕົນເອງ” ການຮັກຕົນເອງຄືຄວາມຮັກທີ່ດີທີ່ສຸດ ແລະ ເມື່ອເຮົາຮັກຕົນເອງຫຼາຍພໍເຮົາຈະບໍ່ຄາດຫວັງກັບຄົນອື່ນ ພ້ອມທັງມອບຄວາມຮັກເມດຕາໃຫ້ແກ່ຄົນອື່ນຈາກໃຈຈິງ.
•ຄວາມຮັກທີ່ດີສ້າງໄດ້ ໂດຍບໍ່ຕ້ອງລໍຖ້າຮັບຈາກໃຜ.
ຄວາມຮັກບໍ່ຈຳເປັນຕ້ອງໄປຮ້ອງຂໍຈາກໃຜ ເພາະເຮົາສ້າງມັນຂຶ້ນມາໄດ້ໂດຍການ ພະຍາຍາມຮູ້ຈັກ ແລະ ເຂົ້າໃຈຕົນເອງໃຫ້ຫຼາຍ, ເຫັນຄຸນຄ່າໃນຕົນເອງ, ເຊື່ອໃນຄວາມສາມາດຂອງຕົນເອງ, ໃຫ້ອະໄພຕົນເອງ, ສ້າງຄວາມສຸກໃຫ້ຕົນເອງ ພ້ອມທັງຍິ້ມຫົວຫຼາຍໆ ນີ້ແມ່ນຄວາມຮັກທີ່ດີທີ່ບໍ່ຈໍາເປັນຕ້ອງເພິ່ງອາໄສຈາກໃຜ.
ນອກຈາກນີ້, LaoX ໄດ້ນຳ 7 ວິທີການຮັກ ແລະ ເມດຕາແກ່ຕົນເອງມາໃຫ້ໄດ້ປະຕິບັດນຳກັນ
1. ເຝິກສະຕິ: ໃສ່ໃຈຄວາມຄິດ ແລະ ຄວາມຮູ້ສຶກຂອງຕົນເອງໂດຍບໍ່ຕັດສິນ ເຊິ່ງຊ່ວຍຫຼຸດຜ່ອນການເວົ້າ-ຄິດ ໃນແງ່ລົບ ແລະ ເພີ່ມຄວາມຮັບຮູ້ແກ່ຕົນເອງ.
2. ເວົ້າກັບຕົນເອງຄືກັບເວົ້າກັບໝູ່: ເວົ້າໃຫ້ກຳລັງໃຈຕົນເອງ, ເຕືອນຕົນເອງວ່າຄວາມຜິດພາດ ແລະ ຄວາມລົ້ມເຫຼວແມ່ນ ຄວາມປົກກະຕິຂອງຊີວິດ ແລະ ປະຕິບັດຕໍ່ຕົນເອງດ້ວຍຄວາມເມດຕາ ແລະ ຄວາມເຂົ້າໃຈ.
3. ທ້າທາຍຕົນເອງໃນແງ່ລົບ: ເມື່ອສັງເກດເຫັນວ່າຕົນເອງມີຄວາມຄິດໃນແງ່ລົບ, ເຝິກຄິດໃຫ້ເປັນທາງບວກຫຼາຍຂຶ້ນ.ຕົວຢ່າງ: ແທນທີ່ຈະເວົ້າວ່າ “ເປັນຫຍັງຂ້ອຍຈຶ່ງເຮັດມັນບໍ່ໄດ້ດີເລີຍ?” ພະຍາຍາມເວົ້າວ່າ “ທຸກຄົນເຄີຍເຮັດຜິດພາດ ຄັ້ງຕໍ່ໄປຂ້ອຍຈະເຮັດໄດ້ດີກວ່ານີ້.”
4. ເບິ່ງແຍງຕົນເອງ: ເບິ່ງແຍງສຸຂະພາບກາຍ ແລະ ຈິດໃຈໃຫ້ດີດ້ວຍການເຮັດກິດຈະກຳທີ່ເຮັດໃຫ້ທ່ານມີຄວາມສຸກ, ຜ່ອນຄາຍ ແລະ ຈິດໃຈສະຫງົບ.
5. ການສະໜັບສະໜູນຈາກຄົນອ້ອມຂ້າງ: ພາຕົນເອງໄປຢູ່ໃນແວດລ້ອມທີ່ເຕັມໄປດ້ວຍພະລັງບວກ, ຄົນອ້ອມຂ້າງທີ່ສະໜັບສະໜູນ ແລະ ໃຫ້ກຳລັງໃຈເຈົ້າ ໂດຍຫລີກເວັ້ນຄົນທີ່ຄິດໃນແງ່ລົບ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/
