ລັດຖະມົນຕີການຄ້າອິນໂດເນເຊຍໄດ້ເປີດເຜີຍວ່າ ອິນໂດເນເຊຍມີແຜນຈະເກັບພາສີປ້ອງກັນການນຳເຂົ້າໃນອັດຕາ 100-200% ນັບຕັ້ງແຕ່ເກີບໜັງຈົນຮອດເຄື່ອງປັ້ນດິນເຜົາ. ເຊິ່ງນີ້ແມ່ນການຟື້ນຟູແຜນການປົກປັກຮັກສາອຸດສາຫະກຳຕ່າງໆຢູ່ພາຍໃນປະເທດ, ເນື່ອງຈາກມີຄວາມຢ້ານກົວວ່າ ຖ້າຫາກສິນຄ້ານຳເຂົ້າໄຫຼເຂົ້າສູ່ໂດເນເຊຍເປັນຈຳນວນຫຼວງຫຼາຍ. ມັນກໍອາດຈະມີຜົນກະທົບຢ່າງໜັກຕໍ່ວິສາຫະກິດຂະໜາດນ້ອຍ ແລະ ຂະໜາດກາງ
ໃນປີທີ່ຜ່ານມາ, ອິນໂດເນເຊຍໄດ້ອອກກົດລະບຽບໃຫ້ເຂັ້ມງວດໃນການກວດສອບສິນຄ້ານຳເຂົ້າກວ່າ 3.000 ລາຍການ, ນັບຕັ້ງແຕ່ສ່ວນປະກອບອາຫານ, ເອເລັກໂຕຣນິກໄປຈົນເຖິງສານເຄມີ. ຢ່າງໃດກໍຕາມ, ຕໍ່ມາກົດລະບຽບໄດ້ຖືກຍົກເລີກໃນພາຍຫຼັງ. ເມື່ອກຸ່ມອຸດສາຫະກໍາພາຍໃນໄດ້ສະແດງຄວາມບໍ່ພໍໃຈ ທັງນີ້ກໍຍ້ອນວ່າກົດລະບຽບດັ່ງກ່າວຖືເປັນອຸປະສັກຕໍ່ການນຳເຂົ້າວັດຖຸດິບທີ່ຈຳເປັນຂອງຜູ້ຜະລິດເຊັ່ນກັນ.
ແນວໃດກໍດີ, ມາດຕະການຫຼ້າສຸດໃນການເກັບພາສີນຳເຂົ້າຈະໄດ້ຮັບການປະຕິບັດໃນໄວໆນີ້ ແລະ ຈະສົ່ງຜົນກະທົບຕໍ່ການນຳເຂົ້າເກີບ, ເຄື່ອງນຸ່ງຫົ່ມ, ແຜ່ນແພ, ເຄື່ອງສຳອາງ ແລະ ເຄື່ອງປັ້ນດິນເຜົາ.
ທ່ານ Budi Santoso, ເຈົ້າໜ້າທີ່ຂັ້ນສູງຂອງກະຊວງການຄ້າຂອງອິນໂດເນເຊຍກ່າວວ່າ ຄະນະກຳມະການປ້ອງກັນການຄ້າຂອງອິນໂດເນເຊຍກຳລັງດຳເນີນການສືບສວນເພື່ອກຳນົດອັດຕາພາສີປ້ອງກັນທີ່ເໝາະສົມ. ທັງນີ້, ອິນໂດເນເຊຍນຳເຂົ້າເຄື່ອງນຸ່ງຫົ່ມ ແລະ ເຄື່ອງນຸ່ງສ່ວນຫຼາຍຈາກຈີນ, ຫວຽດນາມ ແລະ ບັງກະລາເທດເປັນສ່ວນໃຫຍ່.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
