ຫຼາຍບໍລິສັດໃນຍີ່ປຸ່ນ ປະກາດຂຶ້ນເງິນເດືອນຄັ້ງໃຫຍ່ທີ່ສຸດໃນຮອບ 20 ປີ ເພື່ອຊ່ວຍພະນັກງານຕໍ່ສູ້ກັບໄພເງິນເຟີ້

ຫຼາຍບໍລິສັດໃນຍີ່ປຸ່ນ

ບໍລິສັດຍັກໃຫຍ່ຂອງຍີ່ປຸ່ນຫຼາຍບໍລິສັດຕົກລົງເຫັນດີທີ່ຈະຍົກລະດັບຄ່າຈ້າງໃຫ້ສູງທີ່ສຸດໃນຮອບຫຼາຍທົດສະວັດ ໃນລະຫວ່າງການເຈລະຈາກັບສະຫະພາບແຮງງານ ເມື່ອວັນທີ 15 ມີນາທີ່ຜ່ານມານີ້ ຫຼັງຈາກທ່ານ ຟູມິໂອະ ຄິຊິດະ (Fumio Kishida) ປະທານາທິບໍດີຍີ່ປຸ່ນ ໄດ້ຮຽກຮ້ອງ ໃຫ້ ບັນດານັກທຸລະກິດ ແລະ ບໍລິສັດເອກະຊົນ ຍົກລະດັບຄ່າແຮງງານຂຶ້ນເພື່ອຊ່ວຍໃຫ້ປະຊາຊົນຮັບມືກັບເງິນເຟີ້ທີ່ເພີ່ມຂຶ້ນ.

ນັບແຕ່ຊຸມປີ 1990 ເປັນຕົ້ນມາ ອັດຕາຄ່າຈ້າງຂອງພະນັກງານທີ່ໄດ້ຮັບຄ່າຈ້າງໃນປະເທດຍີ່ປຸ່ນເກືອບຈະບໍ່ມີການເໜັງຕີງເລີຍ ອີງຕາມອົງການຮ່ວມມືດ້ານເສດຖະກິດ ແລະ ການພັດທະນາ (OECD) ຄ່າແຮງງານສະເລ່ຍຂອງຍີ່ປຸ່ນໄດ້ເພີ່ມຂຶ້ນພຽງ 6,3% ຈາກປີ 1990 ຫາ 2021. ສ່ວນປະເທດ ອື່ນໆຂອງ G7 ເຊັ່ນ: ສະຫະລັດອາເມຣິກາ ແລະ ປະເທດອັງກິດ ໄດ້ເພີ່ມຂຶ້ນຫຼາຍກວ່າ 50% ໃນໄລຍະດຽວກັນ.

ຫຼາຍບໍລິສັດໃນຍີ່ປຸ່ນ

ແຕ່ຢ່າງໃດກໍຕາມ ລາຄາຄ່າຄອງຊີບ ແລະ ອັດຕາເງິນເຟີ້ຂອງຍີ່ປຸ່ນໄດ້ເພີ່ມຂຶ້ນສູງສຸດໃນຮອບ 40 ປີ ໂດຍຄ່າຄອງຊີບພື້ນຖານໄດ້ເພີ່ມຂຶ້ນກວ່າ 4,2% ໃນເດືອນມັງກອນເມື່ອປຽບທຽບປີຕໍ່ປີ ແລະ ການຂະຫຍາຍຕົວທີ່ໄວທີ່ສຸດນັບຕັ້ງແຕ່ເດືອນກັນຍາ ປີ 1981, ພາຍໃຕ້ຄວາມກົດດັນຈາກການອ່ອນຄ່າຂອງເງິນເຢນ ແລະ ຕົ້ນທຶນສິນຄ້າທີ່ດີດຕົວຂຶ້ນ. ສົ່ງຜົນໃຫ້ລັດຖະບານຂອງ ນາຍົກ ຄິຊິດະ ໄດ້ພະຍາຍາມຊຸກຍູ້ໃຫ້ນັກທຸລະກິດຍົກລະດັບຄ່າແຮງງານໃຫ້ແກ່ພະນັກງານຂອງເຂົາເຈົ້າ.

Nissan ໜຶ່ງໃນຜູ້ນຳດ້ານພາຫະນະ ຂອງຍີ່ປຸ່ນ ກໍໄດ້ປະກາດ ຈະປັບຂຶ້ນເງິນເດືອນສະເລ່ຍ 12.000 ເຢນ ເຊິ່ງກາຍເປັນການປັບເງິນເດືອນຂອງພະນັກງານຄັ້ງໃຫຍ່ທີ່ສຸດນັບຕັ້ງແຕ່ປີ 2004. ນອກຈາກນີ້ ທາງບໍລິສັດ ຍັງໄດ້ມີການປະກາດກຽມປັບຂຶ້ນເປັນເດືອນລະ 5,5 ຕາມຄຳຮຽກຮ້ອງຂອງສະພາແຮງງານ. ສ່ວນ Toyota Motor ກຽມຂຶ້ນເງິນເດືອນສູງສຸດໃນຮອບ 20 ປີ ຂະນະທີ່ Honda Motor ກໍຕົກລົງທີ່ຈະປັບຄ່າແຮງຂຶ້ນສູງສຸດ ໃນຮອບ 30 ປີ.

ຫຼາຍບໍລິສັດໃນຍີ່ປຸ່ນ

ນອກຈາກອຸດສາຫະກໍາລົດແລ້ວ ບໍລິສັດອີເລັກໂທຣນິກ Hitachi ຍັງຕັດສິນໃຈຍົກລະດັບເງິນເດືອນພື້ນຖານໃຫ້ໄດ້ 7.000 ເຢນ, ຫຼືເພີ່ມຂຶ້ນໃນລະດັບສູງສຸດນັບຕັ້ງແຕ່ປີ 1998. ສ່ວນຍີ່ຫໍ້ເຄື່ອງດື່ມຢ່າງ Sapporo ແມ່ນກໍານົດທີ່ຈະເພີ່ມເງິນເດືອນພື້ນຖານຂຶ້ນອີກ 9.000 ເຢນ ສູງສຸດໃນຮອບ 40 ປີ.

ເຖິງຢ່າງໃດກໍຕາມ, ສຳລັບບໍລິສັດຂະໜາດນ້ອຍ ແລະ ຂະໜາດກາງ ແມ່ນຍັງບໍ່ມີການຢືນຢັນຊັດເຈນ ວ່າຈະມີນະໂຍບາຍດັ່ງກ່າວຫຼືບໍ່ ເພາະພວກເຂົາຍັງກັງວົນທີ່ຈະຕ້ອງປ່ອຍໃຫ້ລູກຄ້າແບກຮັບຕົ້ນທຶນທີ່ສູງຂຶ້ນ.

ຂອບໃຈຂໍ້ມູນຈາກ:

ຕິດຕາມຂ່າວທັງໝົດຈາກ LaoX: https://laox.la/all-posts/