ລັດຖະບານ ສປປ ລາວ ກຽມອອກນະໂຍບາຍ ສໍາລັບນັກທ່ອງທ່ຽວຈີນ ເຂົ້າມາທ່ອງທ່ຽວລາວໂດຍບໍ່ເສຍຄ່າວີຊາ ພາຍໃນປີທ່ອງທ່ຽວລາວ 2024 ທີ່ເຫຼືອເວລາອີກ 6 ເດືອນນີ້ ເພື່ອດຶງນັກທ່ອງທ່ຽວຈີນ ເຊິ່ງເປັນກຸ່ມນັກທ່ອງທ່ຽວສຳຄັນເຂົ້າມາປະເທດໃຫ້ຫຼາຍຂຶ້ນ, ຄາດປະກາດໃຊ້ໃນທ້າຍເດືອນນີ້.
ຄຳເຫັນດັ່ງກ່າວ ມາຈາກ ທ່ານນາງ ດາລານີ ພົມມະວົງສາ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ໃຫ້ສຳພາດກັບໜັງສືພີມ China Daily ໃນໂອກາດການມາຢ້ຽມຢາມ ສປປ ລາວ ຜ່ານເສັ້ນທາງລົດໄຟລາວ-ຈີນ ຂອງຄະນະຜູ້ແທນສື່ມວນຊົນອາຊຽນ.
ທ່ານ ນາງ ດາລານີ ກ່າວວ່າ: ນະໂຍບາຍດັ່ງກ່າວ ແມ່ນເນັ້ນໃສ່ນັກທ່ອງທ່ຽວຈີນທີ່ເຂົ້າມາເປັນກຸ່ມ ໂດຍພາຍໃຕ້ການບໍລິການຂອງບໍລິສັດນໍາທ່ຽວ.
ນອກຈາກການໃຫ້ຟຣີວີຊ່າແກ່ນັກທ່ອງທ່ຽວຈີນທີ່ມາເປັນກຸ່ມແລ້ວ, ຍັງມີນະໂຍບາຍວີຊ່າສໍາລັບບາງຕະຫຼາດທ່ອງທ່ຽວເປົ້າໝາຍ ທີ່ເປັນລະດັບຕົ້ນໆຂອງປະເທດ ໂດຍການຂະຫຍາຍເວລາພັກເຊົາ ຈາກ 30 ວັນ ເປັນ 60 ວັນ ເພື່ອສ້າງເງື່ອນໄຂທີ່ສະດວກສະບາຍ ແລະ ແຮງຈູງໃຈໃຫ້ບັນດານັກທ່ອງທ່ຽວເຂົ້າມາພັກເຊົາຢູ່ລາວ ຫຼາຍຂຶ້ນ.
ເພື່ອຮອງຮັບການເພີ່ມຂື້ນຂອງຈໍານວນນັກທ່ອງທ່ຽວ ແລະ ສ້າງປະສົບການທີ່ດີໃຫ້ແກ່ນັກ ທ່ອງທ່ຽວ, ລັດຖະບານໄດ້ເອົາໃຈໃສ່ການຟື້ນຟູ, ອະນຸລັກ ແລະ ສົ່ງເສີມວັດທະນະທຳ ທີ່ໂດດເດັ່ນ ຂອງລາວ; ປົກປັກຮັກສາ, ບູລະນະ, ປະຕິສັງຂອນ ໂບຮານສະຖານທີ່ເກົ່າແກ່; ສົ່ງເສີມຄວາມຫຼາກ ຫຼາຍທາງດ້ານຊົນເຜົ່າ, ການຸ່ງຖື ແລະ ອາຫານການກິນທີ່ເປັນເອກະລັກຂອງທ້ອງຖິ່ນ, ສິລະປະ ຫັດຖະກຳ ສີໄມ້ລາຍມືອັນປານີດງົດງາມຂອງເຜົ່າຕ່າງໆ ໂດຍສະເພາະແຂວງພາກເໜືອ ຕາມເສັ້ນທາງ ລົດໄຟລາວ-ຈີນ.
ທ່ານ ນາງ ດາລານີ ໄດ້ຍົກໃຫ້ເຫັນເຖິງບົດບາດສຳຄັນຂອງ ເສັ້ນທາງລົດໄຟ ລາວ-ຈີນ ທີ່ປະກອບສ່ວນເຂົ້າຢ່າງຕັ້ງໜ້າໃນການພັດທະນາເສດຖະກິດຂອງ ສປປ ລາວ ໂດຍສະເພາະ ການທ່ອງທ່ຽວ.
ຮອງລັດຖະມົນຕີກ່າວວ່າ: ເສັ້ນທາງລົດໄຟລາວ-ຈີນ ໄດ້ປະກອບສ່ວນຢ່າງເຂັ້ມແຂງ ໃນການອໍານວຍຄວາມສະດວກໃຫ້ ຜູ້ໂດຍສານ ແລະ ນັກທ່ອງທ່ຽວ. ບໍລິສັດລົດໄຟລາວ-ຈີນ ໄດ້ໃຫ້ຄວາມຮ່ວມມືຢ່າງຕັ້ງໜ້າໃນການ ຕອບສະໜອງການບໍລິການ ທີ່ປະທັບໃຈ ພ້ອມທັງຊຸກຍູ້ກິດຈະກຳໂຄສະນາການທ່ອງທ່ຽວ ໂດຍການເຂົ້າຮ່ວມການຈັດລາຍການຢ້ຽມຢາມສະຖານທີ່ທ່ອງທ່ຽວ Famtrip ຕາມເສັ້ນທາງລົດໄຟ ເພື່ອ ໂຄສະນາຜະລິດຕະພັນການທ່ອງທ່ຽວຂອງລາວ ແລະ ຈຸດໝາຍປາຍທາງການທ່ອງທ່ຽວ ທີ່ມີຊື່ສຽງຂອງລາວ.
ໃນປີຜ່ານມາ (ແຕ່ວັນທີ 13 ເມສາ 2023 ຫາເດືອນເມສາ 2024) ນັບແຕ່ປີ 2024 ເປັນຕົ້ນມາ. ການບໍລິການລົດໄຟຂ້າມຊາຍແດນລະຫວ່າງນະຄອນຫຼວງວຽງຈັນ ແລະ ຄຸນໝິງ ໄດ້ຂົນສົ່ງຜູ້ໂດຍສານຂ້າມຊາຍແດນຫຼາຍກວ່າ 172,000 ຄົນ.
ອີງຕາມການລາຍງານຂອງໜັງສືພິມ ວຽງຈັນທາມໃນ 4 ເດືອນຕົ້ນປີນີ້, ລາວໄດ້ຕ້ອນຮັບນັກທ່ອງທ່ຽວຕ່າງປະເທດ 1,5 ລ້ານເທື່ອຄົນ, ເພີ່ມຂຶ້ນປະມານ 35% ເມື່ອທຽບໃສ່ໄລຍະດຽວກັນຂອງປີກາຍ. ນັກທ່ອງທ່ຽວຈີນມີຈຳນວນຢ່າງໜ້ອຍ 351,000 ຄົນ, ເຮັດໃຫ້ຈີນເປັນແຫຼ່ງນັກທ່ອງທ່ຽວຕ່າງປະເທດໃຫຍ່ອັນດັບ 3 ຂອງລາວຮອງຈາກໄທ ແລະ ຫວຽດນາມ ຕາມລໍາດັບ. ຈຳນວນນັກທ່ອງທ່ຽວຈາກທຸກປະເທດອາຊຽນເພີ່ມຂຶ້ນເປັນ 862.000 ກວ່າຄົນ, ເພີ່ມຂຶ້ນ 18% ເມື່ອທຽບໃສ່ໄລຍະດຽວກັນຂອງປີ 2023.
ຕິດຕາມຂ່າວທັງໝົດຈາກ LaoX: https://laox.la/all-posts/
