ທະນາຄານແຫ່ງ ສປປ ລາວ (ທຫລ) ປະຈຳພາກໃຕ້ ແຂວງຈໍາປາສັກ ໄດ້ຈັດກອງປະຊຸມຊຸກຍູ້ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ໃຫ້ຜູ້ທີ່ຕ້ອງການເຂົ້າຫາທຶນສາມາດເຂົ້າຫາທຶນໄດ້ຕາມເປົ້າໝາຍ ແລະ ໃຫ້ບັນລຸຕາມລະດັບຄາດໝາຍທີ່ກຳນົດໄວ້.
ອີງຕາມການລາຍງານຂອງ ຂ່າວສານປະເທດລາວ, ກອງປະຊຸມດັ່ງກ່າວ ມີຂຶ້ນ ຢູ່ແຂວງອັດຕະປື ໃນວັນທີ 9 ກໍລະກົດ 2024 ໂດຍການເປັນປະທານຂອງທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ແຂວງອັດຕະປື ທັງເປັນຮອງຫົວໜ້າຄະນະຮັບຜິດຊອບ ຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນຂັ້ນແຂວງ, ທ່ານ ນາງ ສີພະຈັນ ເຂັມມະນີວົງ ຮອງຫົວໜ້າທະນາຄານແຫ່ງ ສປປ ລາວ ພາກໃຕ້ແຂວງຈໍາປາສັກ ພ້ອມດ້ວຍຄະນະຮັບຜິດຊອບຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ພອນປະເສີດ ທອງສີທາວົງ ໄດ້ກ່າວວ່າ: ກອງປະຊຸມຄັ້ງນີ້ ເພື່ອຜັນຂະຫຍາຍຂໍ້ຕົກລົງ ວ່າດ້ວຍການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ໃຫ້ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ເປັນເອກະພາບໃນຂອບເຂດທ້ອງຖິ່ນທົ່ວປະເທດ ເວົ້າລວມ, ເວົ້າສະເພາະ ຢູ່ແຂວງອັດຕະປື ເພື່ອແນໃສ່ໃຫ້ບັນດາຫົວໜ່ວຍທຸລະກິດທີ່ຢູ່ໃນຂະແໜງການຜະລິດ, ການຄ້າ ແລະ ການບໍລິການ ທີ່ເປັນປາຍແຫຼມຂອງແຂວງ ສາມາດເຂົ້າເຖິງແຫຼ່ງທຶນນະໂຍບາຍທີ່ເໝາະສົມ, ອີກດ້ານໜຶ່ງ ແມ່ນເພື່ອທົບທວນຕີລາຄາສະພາບ ການເຄື່ອນໄຫວການຈັດຕັ້ງປະຕິບັດ ພ້ອມທັງວາງທິດທາງແຜນການ ເພື່ອຊຸກຍູ້ສົ່ງເສີມທັງ 2 ນະໂຍບາຍສິນເຊື່ອດັ່ງກ່າວ ໃຫ້ບັນລຸຕາມລະດັບຄາດໝາຍທີ່ກຳນົດໄວ້.
ທ່ານ ນາງ ສີພະຈັນ ເຂັມມະນີວົງ ໄດ້ຜ່ານບົດລາຍງານການຈັດຕັ້ງປະຕິບັດນະໂຍບາຍສິນເຊື່ອກະຕຸ້ນເສດຖະກິດ ແລະ ກະຈາຍແຫຼ່ງທຶນສູ່ທ້ອງຖິ່ນ ຢູ່ແຂວງອັດຕະປື ໂດຍໄດ້ຍົກໃຫ້ເຫັນການຄົ້ນຄວ້າພິຈາລະນາສິນເຊື່ອກະຈາຍແຫຼ່ງທຶນສູ່ທ້ອງຖິ່ນ ສະເພາະແຂວງອັດຕະປື ຮອດທ້າຍເດືອນ ມິຖຸນາ 2024 ມີການຍື່ນສະເໜີຂໍນະໂຍບາຍສິນເຊື່ອຜ່ານທະນາຄານທຸລະກິດ ທັງໝົດ 6 ລາຍ ລວມເງິນກູ້ສະເໜີ ມີ 11 ຕື້ກວ່າກີບ ໃນນັ້ນ, ທະນາຄານທຸລະກິດ ໄດ້ຄົ້ນຄວ້າສະເໜີຜ່ານ ສາຂາ ທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແຂວງຈຳປາສັກ ແລະ ໄດ້ອະນຸມັດສິນເຊື່ອ ຈໍານວນ 3 ລາຍ ລວມວົງເງິນກູ້ 2 ຕື້ກວ່າກີບ ກວມເອົາຫຼາຍກວ່າ 3% ທຽບໃສ່ແຜນປີ ແລະ ເບີກຖອນນໍາໃຊ້ເງິນກູ້ແລ້ວ 3 ລາຍ ລວມວົງເງິນ 2 ຕື້ກວ່າກີບ, ສ່ວນລາຍຮັບດອກເບ້ຍ ແມ່ນກຳລັງທວງຊຳລະງວດເດືອນ ມິຖຸນາ ຈຳນວນ 8 ລ້ານກວ່າກີບ.
ໃນກອງປະຊຸມ, ຜູ້ເຂົ້າຮ່ວມ ໄດ້ປະກອບຄຳເຫັນ ເພື່ອເຮັດໃຫ້ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ຢູ່ແຂວງອັດຕະປື ເກີດປະສິດທິຜົນສູງສຸດແກ່ທ້ອງຖິ່ນ ແລະ ບັນລຸຕາມເປົ້າໝາຍທີ່ກໍານົດໄວ້.
ຕິດຕາມຂ່າວທັງໝົດຈາກ LaoX: https://laox.la/all-posts/
